अकोल्यातील सांस्कृतिक भवन लोकार्पणापूर्वीच अडगळीत; अपूर्ण कामामुळे इमारत पडून

अकोला सकल कलावंत सांस्कृतिक मंचने एक सभा घेतली. त्यामध्ये नाट्य, नृत्य, गायन, लोककला, संगीत, साहित्य, चित्रकला, छायाचित्रकार व इतर सर्व क्षेत्रातील कलावंत सहभाग झाले होते. या सभेत आमदार व जिल्हाधिकाऱ्यांना नवीन सांस्कृतिक भवन निर्मितीसाठी निवेदन देण्याचे ठरले. त्यानुसार मंचच्यावतीने आमदार रणधीर सावरकर व जिल्हाधिकारी अजित कुंभार यांची भेट घेऊन निवेदन दिले. क्रीडा संकुल येथील सांस्कृतिक भवन त्वरित पूर्ण करावे, स्व. प्रमिलाताई ओक सभागृहाचे दर कमी करण्यासाठी योग्य ते पाऊल उचलावे, नाट्यकलावंतांसाठी हक्काची तालमीची जागा त्वरित उपलब्ध करून द्यावी, अकोल्यातील इतर कार्यक्रम सादरीकरणासाठी लहान नाट्यगृह उभारावे आदी मागण्या निवेदनाद्वारे करण्यात आल्या आहेत.

हेही वाचा : चंद्रपुरात वाघाला पळविण्यासाठी मुखवट्याचा प्रयोग

या मागण्यांना आ.सावरकर व जिल्हाधिकाऱ्यांनी सकारात्मक प्रतिसाद दिला. सांस्कृतिक कार्य मंत्र्यामार्फत मुख्यमंत्र्यांना पत्र देऊन आवश्यक तो निधी तात्काळ उपलब्ध करुन देण्यात येईल. कलावतांच्या मागण्यांसंदर्भात पाठपुरावा करू, असे आश्वासन आ.सावरकर यांनी दिले. यावेळी कलावंत सांस्कृतिक मंचचे दिलीप देशपांडे, शाहीर वसंत मानवटकर, प्रा. तुकाराम बिरकड, प्रा. निलेश जळमकर, प्रशांत जामदार, सचिन गिरी, सुधाकर गिते, देवेंद्र देशमुख, किशोर बळी, निलेश देव, नीरज भांगे, अनिल कुलकर्णी आदींसह बहुसंख्य कलावंत उपस्थित होते.