नागपूर : बांंगलादेशातून तीन लाख रुपयांच्या बनावट नोटा भारतात आणल्याचा प्रकार समोर आला आहे. लोहमार्ग पोलिसांनी ७० हजार ५०० किंमतीच्या बनावट नोटा आरोपींकडून जप्त केल्या आहेत. तर उर्वरित नोटा त्यांनी वेगवेगळ्या ठिकाणी खर्च केल्याची बाब तपासात स्पष्ट झाली आहे.
रेल्वेस्थानकावर खाद्यपदार्थ घेतल्यानंतर ग्राहकाने विक्रेत्याला दिलेली ५०० रुपयांची नोट बनावट असल्याचे लक्षात आले. यानंतर बांगलादेशातून बनावट नोटा आणून भारतात चलनात आणण्याचा प्रकार ३ एप्रिल २०२४ रोजी उघडकीस आला. त्यानंतर नागपूर लोहमार्ग पोलिसांनी अधिक तपास करून संपूर्ण साखळी शोधून काढली. याप्रकरणी लखपर मंडल (४२) रा. पश्चिम बंगाल, मामून मंडल (१९) रा. ग्रामीण, पश्चिम बंगाल, यमुना प्रसाद शाह (३५) रा. पुणे, इंद्रजित मंडल (३३) रा. पश्चिम बंगाल, संतोष मंडल (३६) रा. मालदा, किशोर शिंदे (३२) रा. चाकण, पुणे, आणि शशिकला ऊर्फ सानिका दौंडकर (४२) रा. पुणे यांना अटक करण्यात आली आहे.
हेही वाचा >>>अपहृत व्यावसायिकाचा शोध लागेना, अकोला पोलिसांपुढे आव्हान; माहिती देणाऱ्यास इतक्या रुपयांचे बक्षीस
पाच आरोपींना पश्चिम बंगाल, तर दोन आरोपींना पुणे येथून अटक करण्यात आली. आरोपींच्या ताब्यातून ७० हजार ५०० रुपये भारतीय चलनात नसलेल्या बनावटी नोटा जप्त करण्यात आल्या. यात ५०० रुपयांच्या ७१ नोटा आहे. या टोळीचा म्होरक्या इनामूल हक (४०) रा. मालदा, पश्चिम बंगाल हा बनावट नोटांचा व्यवसाय करतो. सध्या तो मालदाच्या कारागृहात आहे. पोलीस निरीक्षक मनीषा काशीद यांनी तपासात ठिकठिकाणी छाडी घालून आरोपींना अटक केली.
असा झाला भंडाफोड
३ एप्रिल २०२४ रोजी हावडा-मुंबई गीतांजली एक्सप्रेस प्लॅटफार्म क्रमांक ६ वर थांबली होती. खाद्यपदार्थ विक्रेता अनिल तिवारी यांच्याकडून एका प्रवाशाने खाद्यपदार्थ घेतले आणि ५०० रुपये दिले. खाद्यपदार्थ ५० रुपयाचे झाले. अनिलने त्याला ४५० रुपये परत केले. मात्र, ५०० रुपयांची नोट बनावट असल्याचा संशय आला. त्याने प्रवाशाला आवाज दिला. पण, तो थांबला नाही. गाडी सुरू झाली. तेव्हा आरपीएफ जवान आशीष कुमार लक्ष्यकारच्या मदतीने त्याला पकडण्यात आले व पुढील तपास सुरू झाला.
