बुलढाणा : मद्य विक्रीवर वाढीव दहा टक्के व्हॅट कराच्या आणि अन्य अन्यायकारक निर्णयांच्या विरोधात व निषेधार्थ परमिट रूम बार असोसिएशनच्या वतीने आज सोमवारी, १४ जुलै रोजी राज्यव्यापी परमिट बार बंद आंदोलन करण्यात आले. बुलढाणा जिल्ह्यासह राज्यातील हजारो बार बंद ठेवण्यात आल्याने राज्यातील लाखो तळीराम वा मद्यप्रेमींची गैरसोय झाली. दुसरीकडे, राज्य शासनाला मिळणाऱ्या कोट्यवधी रुपयांच्या दैनिक महसुलावर पाणी सोडावे लागले.
परमिट रूम आणि बिअर बार व्यवसायिकांवर शासनाने लादलेल्या अन्यायकारक व्हॅट करवाढी विरोधात आज बुलढाणा जिह्यासह राज्यातील कमी अधिक २४ हजार परमिट बार सहभागी झाल्याचा दावा संघटनेच्या वरिष्ठ पदाधिकाऱ्यांनी केला आहे.
यामुळे राज्य शासनाला दररोज मिळणाऱ्या कोट्यवधी रुपयांच्या महसुलाला मुकावे लागले. याशिवाय राज्यातील लाखो मध्यप्रेमिंची गैरसोय झाली. तसेच परमिट बार वर अवलंबून असलेल्या किराणा, बाटलीबंद पाणी व्यावसायिक, शीत पेय ( कोल्ड्रिंक) ठोक विक्रेते, पाकीट बंद स्नॅक्स व्यावसायिक, मटण- चिकन विक्रेते यांच्या दैनंदिन व्यवसाय व उत्पन्नावर गंभीर परिणाम झाला. राज्यातील २४ हजार बारमध्ये कार्यरत लाखो, कर्मचारी, स्वयंपाकी, वेटर यांनाही आर्थिक फटका बसला.
काय आहे मागण्या?
परमिट रूममधील मद्य विक्रीवर १० टक्क्यांनी वाढवलेला व्हॅट रद्द करण्यात यावा, मागणी आहे. तसेच, शासनाने ‘फर्स्ट पॉईंट टॅक्स’ लागू करावा आणि परमिट रूम नूतनीकरणाची वाढवलेली फी कमी करावी अशी मागणी आहे . या वाढीमुळे परवानाधारकांना मोठा आर्थिक फटका बसत असून ग्राहकांवरही अतिरिक्त दराचा भार येत असल्याचा आरोप करण्यात आला आहे.
परमिट बार असोशिएसनचे जिल्हाध्यक्ष किशोर गरड यांनी सांगितले की, जिल्ह्यातील ग्रामीण व शहरी भागातील मिळून ४२५ परमिट बार मालक आजच्या बंद आंदोलनात सहभागी झाले आहे. अगोदर ५ टक्के असलेला व्हॅट शासनाने १० टक्के केला आहे. दरवर्षी कराव्या लागणाऱ्या परमिट नूतनीकरणाच्या दरात ३० टक्के वाढ केली आहे.
मद्याच्या दरात तब्बल ६० टक्के वाढ केली आहे. यामुळे अगोदर २०० रुपयांना मिळणारी बाटली आता ३०० ला मिळत आहे. यामुळे ग्राहकांना मोठा भुर्दंड बसत आहे. या निर्णयाकडे शासनाचे लक्ष वेधण्यासाठी आणि शासनाच्या निर्णयांचा निषेध करण्यासाठी आज सोमवारी, १४ जुलैला राज्यव्यापी परमिट बार बंद आंदोलन करण्यात आले. परमिट रूम धारकांनी आपले हॉटेल्स आणि बार बंद ठेवत तीव्र निषेध व्यक्त केला.
खामगावमध्ये मूक मोर्चा
जिल्ह्याची औद्योगिक व व्यवसाय नगरी म्हणून ओळख असलेल्या खामगाव शहरात आज सोमवारी परमिट बार असोशिएसन तर्फे मूक मोर्चा काढून अन्यायकारक निर्णयांचा निषेध व्यक्त करण्यात आला. जिल्हा अध्यक्ष किशोर गरड व खामगाव शहराध्यक्ष अरविंद मुळीक यांच्या नेतृत्वाखाली हा मोर्चा काढण्यात आला.
महात्मा गांधी उद्यान ते खामगाव उप विभागीय कार्यालय असा मोर्चा काढण्यात आला. यात परमिट बार मालक व कर्मचारी सहभागी झाले. यावेळी एसडीओ यांच्या मार्फत राज्य शासन व संबंधित मंत्रालयाला निवेदन पाठविण्यात आले.
