चंद्रपूर : पोलीस बॅरीकेटला भरधाव दुचाकीची धडक; अपघातात दोन तरुणांचा मृत्यू

मृतकांमध्ये अंकुश सुनील भडगरे (२३) व बावीस वर्षीय मित्राचा समावेश आहे. हा अपघात दुपारी बारा वाजताच्या सुमारास झाला. वरोरा शहरातील रहिवासी असलेला अंकुश व त्याचा मित्र वरोरा येथून रेसर दुचाकीने चंद्रपूरच्या दिशेने निघाले. भद्रावती शहराजवळ पोहोचताच मानोरा फाटा येथे रस्त्याच्या कडेला बॅरीकेट लावण्यात आलेले आहे. या बॅरीकेटला भरधाव वेगात असलेली दुचाकी आदळली.

ही धडक इतकी जोरदार होती की दोन्ही तरुणांचा घटनास्थळीच मृत्यू झाला. भरधाव वेगातील गाडीमुळे हा अपघात झाल्याचे सांगण्यात येत आहे. याप्रकरणी भद्रावती पोलिसांनी मर्ग दाखल करून तपास सुरू केला आहे.