बुलढाणा : चिखली नजीकच्या मेहकर फाटा, येथे आज शनिवारी १३ सप्टेंबर रोजी झालेल्या दुर्देवी अपघातात एका वृद्धाचा मृत्यू झाला. राज्य परिवहन महामंडळाच्या भरधावं बसने भरवेगात धडक दिल्याने दुचाकीस्वार वृद्ध जागीच दगावला आहे.
सायळा (तालुका सिंदखेड राजा जिल्हा बुलढाणा) येथील गणेश दत्तुगीर गिरी (वय ६०) हे आपल्या मोटारसायकल (बजाज सीटी हंड्रेड क्र. एमएच २८ बीयू ०५९३) ने वरून चिखलीकडे येत होते . दरम्यान एस.टी. महामंडळाच्या भरधाव बस (क्र. एमएच ४० एन ९१३३) ने दुचाकीला जोरदार धडक दिली. अपघात एवढा भीषण होता की गणेश गिरी यांचा जागीच मृत्यू झाला.
गणेश गिरी हे चिखली येथील तलाठी विनोद गिरी यांचे वडील होत. त्यामुळे प्रशासकीय वर्तुळात व स्थानिक नागरिकांमध्ये अपघातामुळे खळबळ उडाली. शोककळा पसरली असून हळहळ व्यक्त होत आहे. अपघाताची माहिती मिळताच चिखली पोलीस ठाण्याचे अधिकारी कर्मचारी मेहकर फाटा येथे दाखल झाले. अपघातमुळे काही काळ वाहतूक विस्कळीत झाली. चिखली पोलिसांनी वाहतूक सुरळीत केली. पोलिसांनी घटनास्थळी पंचनामा करून पुढील तपास सुरू केला आहे.
अपघातांची मालिका सुरूच
या मार्गावर वाहतुकीची वाढती कोंडी व निष्काळजी वाहनचालकांमुळे अपघातांची मालिका सुरूच आहे. पोलीस, वाहतूक विभाग आणि प्रशासनाने याची गंभीर दखल घेणे काळाची गरज ठरली आहे. तसेच तातडीने उपाययोजना करण्याची मागणी नागरिक, प्रवासी, वाहनधारक मधून होत आहे. मेहकर फाटा परिसरात वेगमर्यादा, वाहतूक पोलिसांची उपस्थिती व अश्या निष्काळजी पणे गाडी चालवनार्यांवर कडक कारवाई करण्याची मागणी होत आहे.
