नागपूर : सूफी संत बाबा ताजुद्दीन यांचा १०३ वा वार्षिक उरूस ताजाबाद शरीफ येथे मोठ्या उत्साहात सुरू झाला आहे. यानिमित्त हजरत बाबा ताजुद्दीन ट्रस्ट कार्यालयातून दरबारी शाही संदल मंगळवारी काढण्यात आले. संदल ताजाबादच्या बुलंदद्वार येथून निघाल्यानंतर उमरेड रोड, शीतला माता मंदिर, सक्करदरा चौक, अशोक चौकापासून महाल, इतवारी, गांधीबागच्या ज्या मार्गावरुन बाबा ताजुद्दीन आपल्या जीवनकाळात फिरले त्या मार्गाने फिरविण्यात आले.
केंद्रीय भूपृष्ठ वाहतूक मंत्री नितीन गडकरी यांनी संत हजरत बाबा ताजुद्दीन यांच्या उरूस आयोजित उत्सवाला नागपुरातील मोठा ताजाबाद येथे रविवारी रात्री उशिरा भेट दिली. यावेळी येथे एक छोटेखानी सभा आयोजित करण्यात आली. याप्रसंगी बोलताना गडकरी म्हणाले, ‘संत ताजुद्दीन बाबा यांचा आशीर्वाद घेण्यासाठी मोठ्या संख्येने लोक नागपुरात येतात. ताजाबाद परिसराचे सौंदर्यीकरण झाले आहे. मात्र आता येथे गोरगरीब रुग्णांच्या उपचारासाठी एक मोठे हॉस्पिटल व्हावे अशी इच्छा आहे.
हजरत बाबा ताजुद्दीन यांचा वार्षिक उरूस १८ जुलैपासून सुरू झाला आहे. यानिमित्त ताजुद्दीन बाबांवर श्रद्धा असलेले लाखो भाविक नागपुरात आले आहे. शाही संदल ताजबागचा रस्ता सक्करदरा चौक ते दिघोरी चौक वाहतुकीसाठी पूर्णपणे बंद करण्यात आला.
मिरवणुकीत वाहतुकीची कोंडी होऊ नये म्हणून, या मार्गावरची सर्व प्रकारची वाहने पर्यायी मार्गावर वळवली गेली. संदल मिरवणुकीदरम्यान तीनगल चौक ते शहीद चौक एकेरी वाहतूक करण्यात आली. या मार्गावर संदल मिरवणूक व दुचाकी वाहने सोडून इतर सर्व वाहनांना प्रवेश बंद करण्यात आले. बंद केलेल्या मार्गावरील वाहतूक आवश्यकतेनुसार पर्यायी मार्गावर वळवण्यात आले.
संबंधित चौक येणारी वाहतूक ही वेळेनुसार इतरत्र पर्यायी मार्गावर वळवण्यात आली. आवश्यकतेनुसार इतरत्र वाहतूक वळवण्याचे अधिकार वाहतूक शाखा पोलीस अधिकाऱ्यांना देण्यात आले.
या मार्गावर वाहतूक बदल
- नागपूरकडून उमरेडकडे जाणाऱ्या बसेस व इतर वाहतूक बैद्यनाथ चौक, मेडिकल चौक, क्रीडा चौक, तुकडोजी पुतळा चौक, मानेवाडा चौक, म्हाळगीनगर चौक, चामट चक्की चौक मार्गे उमरेड रोडचा वापर करतील.
- उमरेड मार्गाकडून नागपूर शहरात येणारी वाहतूक दिघोरी नाका, चामट चक्की चौक डावे वळण घेऊन वळणरस्ता म्हाळगीनगर, मानेवाडा चौक, तुकडोजी पुतळा, मेडिकल, बैद्यनाथ चौक मार्गे वळवली जाईल.
- बॉलीवूड सेंटरकडून चक्रधरनगर बगीचा, भांडे प्लॉट चौकाकडे जाणारी वाहतूक बंद करून ती छोटा ताजबाग चौक, सक्करदरा चौक, तिरंगा चौक, गुरुदेव नगर चौक मार्गे वाहतूक वळवली जाईल.
- गुरुदेवनगर चौकतून भांडे प्लॉट चौकाकडे जाणारी वाहतूक तिरंगा चौक, सक्करदरा चौक, छोटा ताजबाग मार्ग जातील.
