‘अकोला पश्चिम’चा भाजपचा बालेकिल्ला ढासळला

अकोला : विधानसभा निवडणुकीमध्ये जिल्ह्यातील पाच मतदारसंघांपैकी अकोला पूर्वतील विक्रमी विजयासह तीन ठिकाणी कमळ फुलले आहे. अकोला पूर्व, अकोटमध्ये हॅट्ट्रिक, तर मूर्तिजापूरमध्ये भाजपने विजयी चौकर लगावला. तब्बल २९ वर्ष वर्चस्व राखलेला ‘अकोला पश्चिम’ हा भाजपचा बालेकिल्ला ढासळला आहे.

या ठिकाणी काँग्रेसने निसटता विजय मिळवत भाजपला मोठा धक्का दिला. शिवसेना ठाकरे गटाने बाळापूरची जागा कायम राखली. जिल्ह्यात भाजपला तीन, तर काँग्रेस व शिवसेना उबाठा गटाला प्रत्येकी एका जागेवर यश मिळाले.

आणखी वाचा-‘टायगर अभी जिंदा है’! मुनगंटीवार म्हणाले होते, ‘मैं चुनाव हारा हूं, हिम्मत नही’

विधानसभा निवडणुकीत अकोला पूर्व विधानसभा मतदारसंघात भाजपचे रणधीर सावरकर यांनी शिवसेना ठाकरे गटाचे गोपाल दातकर यांचा दारुण पराभव केला. भाजपचे रणधीर सावरकर यांना एक लाख आठ हजार ६१९, शिवसेनेचे गोपाल दातकर ५८ हजार ००६ व वंचितचे ज्ञानेश्वर सुलताने यांना ५० हजार ६८१ मते मिळाली. ५० हजार ६१३ मताधिक्य मिळवत भाजपने दणदणीत विजय मिळवला आहे. तब्बल २९ वर्षे अधिराज्य असलेल्या अकोला पश्चिम मतदारसंघात यावेळेस भाजपला पराभवाचा सामना करावा लागला.

काँग्रेसचे साजिद खान पठाण यांनी भाजपचे विजय अग्रवाल यांचा अवघ्या एक हजार २८३ मतांनी पराभव केला. वंचित समर्थित अपक्ष उमेदवार हरीश आलिमचंदानी यांना २० हजार ५१७ मते मिळाली. या मतदारसंघात भाजपला बंडखोरीचा मोठा फटका बसला. भाजपचे दिवंगत आमदार गोवर्धन शर्मा सलग सहा वेळा येथून निवडून आले होते. त्यांच्या निधनानंतर वर्षभरापासून ही जागा रिक्त होती. या मतदारसंघात भाजपला धक्का देत काँग्रेसने खाते उघडले आहे.

आणखी वाचा-रिसोडमध्ये काँग्रेसचे अमित झनक यांचा विजयी चौकार, वाशीम व कारंजामध्ये नव्यांना संधी

अकोट मतदारसंघामध्ये भाजपचे प्रकाश भारसाकळे यांनी काँग्रेसचे ॲड. महेश गणगणे यांचा १८ हजार ८५१ मतांनी पराभव केला. प्रकाश भारसाकळे यांना ९३ हजार ३३८, ॲड. महेश गणगणे यांना ७४ हजार ४८७ व वंचितचे दीपक बोडखे यांना ३४ हजार १३५ मते मिळाली. भारसाकळे यांनी अकोट मतदारसंघातून विजयाची हॅट्ट्रिक साधली.

मूर्तिजापूर मतदारसंघात भाजपचे हरीश पिंपळे यांनी विजयाचा चौकार लगावला. हरीश पिंपळे यांना ९१ हजार ८२०, राष्ट्रवादी शरद पवार गटाचे सम्राट डोंगरदिवे यांना ५५ हजार ९५६ व वंचितचे सुगत वाघमारेंना ४९ हजार ६०८ मते मिळाली. भाजपचे हरीश पिंपळे यांनी ३५ हजार ८६४ मतांनी विजय प्राप्त केला. बाळापूरची जागा शिवसेना उबाठा गटाने कायम राखली. नितीन देशमुख यांना ८२ हजार ८८, वंचितचे नातिकोद्दिन खतिब ७० हजार ३४९ व शिवसेना शिंदे गटाचे बळीराम सिरस्कारांना ६१ हजार ११२ मते मिळाली. ११ हजार ७३९ मतांनी शिवसेना ठाकरे गटाचा विजय झाला.

आणखी वाचा-काटोलमधील देशमुख पर्व संपुष्टात, सावनेरमध्ये उदय

अकोला पूर्वच्या इतिहासात प्रथमच हॅट्रिक

अकोला पूर्व मतदारसंघातून भाजपचे रणधीर सावरकर यांनी विजयाची हॅट्रिक साधली. मतदारसंघाच्या इतिहासात ही कामगिरी करणारे ते पहिलेच आमदार ठरले आहेत. ५० हजार ६१३ हे विक्रमी मताधिक्य देखील प्राप्त करून मंत्रिपदावर प्रबळ दावा केला आहे.