“दादासाहेब गवई अजातशत्रू व्यक्तिमत्व, त्यांच्या जेवणाच्या डब्याची वाट…’ मुख्यमंत्र्यांनी दिला आठवणींना उजाळा!

संत गाडगेबाबा अमरावती व़िद्यापीठानजीक उभारण्यात आलेल्या रा. सू. गवई यांच्या स्मारकाचे लोकार्पण आज झाले, त्यावेळी ते बोलत होते. कार्यक्रमाला देशाचे सरन्यायाधीश भूषण गवई, उपमुख्यमंत्रीद्वय एकनाथ शिंदे, अजित पवार, महसूल मंत्री चंद्रशेखर बावनकुळे, राज्यमंत्री डॉ. पंकज भोयर, आशीष जयस्वाल प्रामुख्याने उपस्थित होते.

देवेंद्र फडणवीस म्हणाले, दादासाहेब गवई यांनी दीर्घकाळ विधान परिषदेचे उपसभापती, उपसभापती म्हणून काम केले. विरोधी पक्षनेते म्हणून काम करण्याची संधीही त्यांना मिळाली. ते त्यांच्या पक्षाचे एकमेव सदस्य असतानाही सर्वांचे त्यांची निवड सभापती म्हणून करण्यासाठी सर्वांचे एकमत व्हायचे, कारण प्रत्येक पक्षाला ते आसनावरून न्याय देतील, हा विश्वास वेगवेगळ्या पक्षाच्या नेत्यांना होता. त्यांनी विरोधकांसोबतही कधी कटुता ठेवली नाही.

देवेंद्र फडणवीस म्हणाले, दादासाहेब गवई यांनी आपल्या विचारांशी कधीही तडजोड केली नाही. नागपूर येथील दीक्षाभूमीच्या उभारणीतही त्यांचे फार मोठे योगदान राहिले आहे. लोकसभेची पहिली निवडणूक ते डॉ. पंजाबराव देशमुख यांच्या विरोधात लढले. त्यावेळी त्यांची इच्छा देखील नव्हती. त्यांचे आणि पंजाबराव देशमुख यांचे संबंधही अत्यंत चांगले होते. भाऊसाहेबांचा आदर देखील ते करायचे. पण, विचारांसाठी त्यांनी संपूर्ण आयुष्यात जी जबाबदारी मिळाली, ती पत्करली. पक्षाने सांगितले ते उभे राहिले. त्यावेळी ते लोकसभेला निवडून येऊ शकले नाहीत. पण, त्यानंतर अनेक वर्षांनी याच अमरावतीमधून १९९८ मध्ये लोकसभेत खासदार म्हणून निवडून आले. संत गाडगेबाबा यांच्या किर्तनाच्या आधी दादासाहेब गवई यांचे भाषण व्हायचे. अंधश्रद्धेवर ते प्रहार करायचे. समाजातील अनिष्ठ रुढी, परंपरा नष्ट करण्यासाठी त्यांनी कार्य केले. त्यांच्या विचारांचा वारसा पुढे नेण्यासाठी हे स्मारक दिशादर्शक ठरेल.