मेडिकल मधून उपचाराविना अत्यवस्थ मुलाला परत पाठवले

नागपूर : शासकीय वैद्यकीय महाविद्यालय व रुग्णालयातील (मेडिकल) आपत्कालीन विभागात सोमवारी रात्री ३ वाजता एका चार वर्षीय अत्यवस्थ मुलाला नेले असता जीवनरक्षण प्रणाली नाही,असे सांगून त्याला परत पाठवण्यात आल्याची माहिती उघडकीस आली आहे. प्रबुद्ध पाटील असे मुलाचे नाव आहे. तो चांदूर बाजार तालुक्यातील आहे. दोन दिवसांपूर्वी प्रबुद्धला ताप आला. कुटुंबीयांनी त्याला प्रथम स्थानिक व त्यानंतर अमरावती येथील जिल्हा रुग्णालयात हलवले. तेथील डॉक्टरांनी मुलाची प्रकृती गंभीर होत असल्याने सोमवारी रात्री नागपूर ‘मेडिकल’मध्ये उपचारासाठी पाठवले. आई उषा आणि वडील प्रवीण पाटील यांनी प्रबुद्धला मेडिकलमध्ये आणले. त्यावेळी रात्रीचे ३ वाजले होते. आपत्कालीन विभागात डॉक्टरांना दाखवले. मात्र, डॉक्टरांनी उपचार करण्याऐवजी अर्ध्या तासात इतर कोणत्याही रुग्णालयात हलवले नाही तर मुलाचा मृत्यू संभवत असल्याचे सांगितले.