खोडके-राणांमध्ये पुन्हा आरोप-प्रत्यारोपांच्या फैरी

संजय खोडके यांनी एवढी गुर्मी करू नये. दादागिरी करू नये, मोठ्या माणसाने नम्र असले पाहिते, लवचिक असले पाहिजे, सगळ्यांना विनंती केली पाहिजे. पण, तीन वेळा पराभूत करूनही त्यांच्यात सुधारणा झाली नाही, जे लोक अहंकारात राहतात, त्यांना जनतेने धडा शिकवला आहे, असा टोला रवी राणा यांनी लगावला.

संजय खोडके यांचे प्रत्युत्तर

संजय खोडके म्हणाले, रवी राणा हे नेहमीच मला धमक्या देत आले आहेत. आपण खोडके यांचा तीन वेळा पराभव केल्याचे रवी राणांनी म्हटले आहे. पण, जनता ही कुणाला निवडून द्यायचे हे ठरवत असते. तीन वेळा पराभव झाला, हे आम्ही मान्य केलेच आहे. मला त्याची खंत नाही. पण, रवी राणांमध्ये आपल्याला पराभूत करण्याची ताकद नाही. अजित पवार यांनी पन्नास वेळा फोन केल्याचे त्यांनी सांगितले आहे, पण हे सर्व खोटे आहे. याउलट लोकसभा निवडणुकीच्या वेळी रवी राणांनी अजित पवार यांना फोन केले होते. मी प्रचारात यावे, यासाठी त्यांनी अजित पवार यांच्या सभेचे आयोजन केले होते. विमानतळावरून कार्यक्रमस्थळी जात असताना रवी राणा हे अजितदादांना सतत खोडकेंना स्टेजवर बोलवा, अशी विनवणी करीत होते. पण, खोडके हे येणार नाहीत, हे त्यांनी आपल्याला आधीच सांगितले आहे, तुम्ही बोलावले म्हणून मी प्रचाराला आलो, असे अजितदादांनी रवी राणा यांना सुनावले होते, असा दावा संजय खोडके यांनी केला.

आगामी निवडणुकीत रवी राणांचा पक्ष सोबत असेल, तर आम्ही भाजपसोबत युती करणार नाही, ते यापुर्वीही आपण सांगितले आहे आणि आताही हेच स्पष्ट करीत आहोत. रवी राणांच्या वक्तव्यावरून भाजप रवी राणा चालवत आहेत, हे दिसते, असा टोला संजय खोडके यांनी लगावला.