तलवारीने केक कापून ‘बर्थ डे सेलिब्रेशन’! पाच युवक गजाआड…

सार्वजनिक ठिकाणी बेकायदेशीर जमाव जमवून आणि तलवारीसारख्या घातक शस्त्राचा वापर करून दहशत निर्माण केल्याप्रकरणी देऊळगाव राजा येथील सात युवकांविरुद्ध गुन्हा दाखल करण्यात आला आहे. पोलिसांनी त्यापैकी पाच जणांना अटक केली असून, उर्वरित आरोपींचा शोध सुरू आहे. सार्वजनिक ठिकाणी वाढदिवस साजरा करण्याची तरुणांमध्ये वाढती क्रेझ धोकादायक स्वरूप धारण करत आहे. रस्त्यावर किंवा चौकात वाढदिवस साजरा करण्याच्या या प्रकारांमुळे वाढदिवसाला गंभीर  वळण  लागण्याची  शक्यता वाढली आहे.

अशीच एक घटना देऊळगाव राजा येथे  घडली. प्राप्त माहितीनुसार, देऊळगाव राजा-जालना रोडवरील मिस्त्री कोटकर  पेट्रोल पंपासमोर  वाढदिवस साजरा करण्याची घटना उघडकीस आली. मिलन राजेश नाडे (राहणार पिंपळनेर),  उमेश सतीश अंभोरे (राहणार पिंपळनेर),  आयान खान जहीर खान (रा.हणार कबाडपुरा ),  कार्तिक निंबाजी हिवाळे व  शुभम लिंबाजी हिवाळे (दोघे राहणार माळीपुरा),  चंदू साळवे (रा. पिंपळनेर) व विशाल एकनाथ तिडके (राहणार साईनगर, देऊळगाव राजा) या सात जणांनी वाढदिवस साजरा करण्यासाठी  वरील घटना स्थळाची  निवड केली. मुख्य मार्गावर एकत्र जमुन तलवारीने केक कापला.

या कृतीमुळे नागरिकांमध्ये दहशत निर्माण झाली.  आरोपीनी जिल्हाधिकारी बुलढाणा यांनी जारी केलेल्या कलम ३७(१)(३) महाराष्ट्र पोलीस कायद्यांतर्गत आदेश तसेच गृह विभागाच्या आदेशाचे उल्लंघन केले.

घटनेची माहिती मिळताच पोलीस उपविभागीय अधिकारी मनीषा कदम, पोलीस निरीक्षक ब्रह्मगिरी व पोलीस उपनिरीक्षक दत्ता नरवाडे यांनी घटनास्थळी धाव घेतली. पोलिसांनी तत्काळ कारवाई करत सातही आरोपींवर गुन्हा दाखल केला.   पाच आरोपींना अटक करण्यात आली आहे. उर्वरित आरोपींना लवकरच अटक करून न्यायालयासमोर हजर केले जाईल, अशी माहिती पोलीस निरीक्षक ब्रह्मगिरी यांनी दिली.या प्रकरणाचा पुढील तपास देऊळगाव राजा पोलीस करीत आहे.