गडचिरोली : नागपूरमधील मनीषनगरात एका बारमध्ये ‘महाराष्ट्र शासन’ असे लिहिलेल्या फायलींवर स्वाक्षऱ्या केल्याचे प्रकरण उजेडात आल्यानंतर राज्यात खळबळ उडाली होती. हे अधिकारी गडचिरोलीच्या सार्वजनिक बांधकाम विभागाच्या चामोर्शी उपविभागातील उपविभागीय अभियंता देवानंद सोनटक्के असल्याचे निष्पन्न झाले आहे. त्यांचे आज, २९ जुलैला तडकाफडकी निलंबन करण्यात आले. २८ जुलैला या संदर्भातील चित्रफीत समाज माध्यम व माध्यमांवर सार्वत्रिक झाल्याने मंत्री चंद्रशेखर बावनकुळे यांनी चौकशीचे आदेश दिले होते.
नागपूर येथील मनीषनगर भागातील एका बारमध्ये तीन व्यक्ती महाराष्ट्र शासन असे लिहिलेल्या फाईल्सचा गठ्ठा घेऊन बसले होते. त्यापैकी एक त्या फायलीवर स्वाक्षरी करत होता. माध्यमानी हे प्रकरण उजेडात आणल्यानंतर वर्धा येथे महसूलमंत्री चंद्रशेखर बावनकुळे यांनी याबाबत विभागीय आयुक्तांना चौकशीचे आदेश दिल्याचे स्पष्टीकरण दिले होते.
बारमधील सीसीटीव्हीवरुन या अधिकाऱ्याचा शोध घेतला असता मद्याचा घोट घेत स्वाक्षरी करणारे अधिकारी सार्वजनिक बांधकाम विभागाच्या चामोर्शी उपविभागातील देवानंद सोनटक्के असल्याचे निष्पन्न झाले. त्यानंतर सार्वजनिक बांधकाम विभागाच्या विभागीय अभियंत्यांनी त्यांना तडकाफडकी निलंबित केले. गडचिरोलीच्या अधीक्षक अभियंता नीता ठाकरे यांनी या कारवाईला दुजोरा दिला. दरम्यान, जिल्ह्यात सार्वजनिक बांधकामच्या अखत्यारित रस्त्यांच्या कामांच्या दर्जाचा प्रश्न ऐरणीवर असताना अधिकाऱ्याने बारमध्ये बसून स्वाक्षऱ्या केल्याचे प्रकरण समोर आल्याने तीव्र रोष व्यक्त होत आहे.
मद्यपी अधिकाऱ्याचा २४ तासात शोध
सोमवारी हे प्रकरण पुढे आल्यानंतर २४ तासाच्या आत त्या मद्यपी अधिकाऱ्याचा शोध लावण्यात प्रशासनाला यश आले. तत्पूर्वी मंगळवारी दिवसभर तो कर्मचारी कोण याबाबत उत्सूकता शिगेला पोहोचली होती. सांयकाळी या प्रकरणाचा उलगडा झाला. मनीषनगरमधील बारमध्ये सरकारी फाईल्स घेऊन बसलेले अधिकारी हे सार्वजनिक बांधकाम विभाग गडचिरोलीच्या चामोर्शीतील उपविभागीय अभियंता देवानंद सोनटक्के असल्याचे निष्पन्न झाले. त्यामुळे सोनटक्के आणि त्यांच्यासोबत असलेल्या इतरांवर गुन्हे दाखल होण्याची शक्यता आहे. हे अधिकारी यापूर्वीही एका प्रकरणात वादग्रस्त ठरले होते.
