नागपुरात कचऱ्याच्या टिप्परने बहीण, भावाला चिरडले; संतप्त जमावाने टिप्पर पेटवला, दगडफेक

नागपुरातील बिडगाव परिसरात कचरा उचलणाऱ्या टिप्परने सायकलवर जाणाऱ्या बहीण-भावाला चिरडले. शुक्रवारी सकाळच्या घटनेनंतर संतप्त जमावाने दगडफेक करत ट्रक पेटवल्याने तणाव निर्माण झाला होता.

Written by लोकसत्ता टीम

नागपूर

December 29, 2023 17:21 IST

नागपुरात कचऱ्याच्या टिप्परने बहीण, भावाला चिरडले; संतप्त जमावाने टिप्पर पेटवला, दगडफेक (छायाचित्र - लोकसत्ता टीम)

नागपूर: नागपुरातील बिडगाव परिसरात कचरा उचलणाऱ्या टिप्परने सायकलवर जाणाऱ्या बहीण-भावाला चिरडले. शुक्रवारी सकाळच्या घटनेनंतर संतप्त जमावाने दगडफेक करत ट्रक पेटवल्याने तणाव निर्माण झाला होता. पोलिसांनी येथे तगडा बंदोबस्त लावत राज्य राखीव दलाच्या पोलिसांनाही पाचारण केले.

अंजली ननेलाल सैनी (२०) आणि सुमित ननेलाल सैनी (१५) दोघे. रा. अंबेनगर बिडगाव अशी मृतकांची नावे आहेत. दोघेही बहीण-भाऊ आहे. वाठोडा पोलीस ठाण्याच्या हद्दीत भांडेवाडी डम्पींग यार्ड आहे. या परिसरात कचरा उचलणाऱ्या टिप्परची सतत रेल-चेल असते. दरम्यान बिडगाव चौकात सायकलवरून जात असलेल्या अंजली आणि सुमित यांना कचरा उचलणाऱ्या भरधाव टिप्परने जोरदार धडक दिली.

हेही वाचा – यवतमाळ : हॉटेल, ढाब्यावर नववर्ष साजरे करताय? मग हे वाचाच…

हेही वाचा – लग्नाचे आमिष दाखवून इंस्टाफ्रेंडचा तरुणीवर बलात्कार

टिप्परच्या चाकाखाली सापडल्याने दोघांचा जागीच मृत्यू झाला. यावेळी घटनास्थळी नागरिकांची मोठी गर्दी होती. घटनेनंतर संतप्त जमावाने टिप्परला आग लावली. घटनेची माहिती मिळताच वाठोडा पोलिसांचा ताफा घटनास्थळी पोहोचला. टिप्परला लागलेली आग विझविण्यासाठी अग्निशमन दलाच्या वाहनाला पाचारण केले गेले. परंतु संतप्त नागरिकांनी अग्निशमन दलाच्या वाहनावरही दगडफेक करून त्या वाहनाच्या काचा फोडल्या. त्यानंतर वरिष्ठ पोलीस अधिकारी घटनास्थली पोहोचले. जमाव संतप्त होत असल्याचे पाहून राज्य राखीव दलाच्या जवानांना पाचारण केले गेले. यावेळी पोलिसांनी मृतदेहांचा पंचनामा करून दोन्ही मृतदेह शवविच्छेदनासाठी मेडिकल रुग्णालयात पाठवले.

First published on: 29-12-2023 at 17:21 IST