दिव्याखाली अंधार! रस्ते बांधणाऱ्या सार्वजनिक बांधकाम कार्यालयापर्यंत जाण्यासाठीच रस्ता नाही…

पावसामुळे सार्वजनिक बांधकाम विभागाच्या कार्यालया समोरील परिसरात तळे साचून तलाव सदृश्य परिस्थिती निर्माण झाली आहे. सार्वजनिक बांधकाम विभागाचा हा कारभार म्हणजे 'दिव्याखाली अंधार' असेच म्हणावे लागेल.

रस्ते बांधणाऱ्या सार्वजनिक बांधकाम कार्यालयापर्यंत जाण्यासाठीच रस्ता नाही...(छायाचित्र - लोकसत्ता टीम)

भंडारा : भंडारा जिल्ह्यात रस्ते बांधणी आणि महामार्गांचे जाळे विणणाऱ्या सार्वजनिक बांधकाम विभागाच्या कार्यालयापर्यंत जाण्यासाठी पक्का रस्ता नसल्याचे धक्कादायक वास्तव समोर आले आहे. पावसामुळे कार्यालयाच्या समोरील परिसरात तळे साचून तलाव सदृश्य परिस्थिती निर्माण झाली आहे. सार्वजनिक बांधकाम विभागाचा हा कारभार म्हणजे ‘दिव्याखाली अंधार’ असेच म्हणावे लागेल.

सार्वजनिक बांधकाम विभाग आणि राष्ट्रीय महामार्ग प्राधिकरण सारख्या संस्था संपूर्ण जिल्ह्यात रस्ते बांधणीचे काम करते. नागरिकांना एका ठिकाणाहून दुसऱ्या ठिकाणी जाण्यासाठी सुकर मार्ग बांधण्याचे काम या विभागाचे आहे मात्र जिल्ह्यात रस्त्यांचे जाळे विणणाऱ्या या विभागात नागरिकांना एखाद्या कामासाठी जायचे असल्यास चक्क मार्ग शोधावा लागतो. उपविभागीय अभियंता कार्यालयापर्यंत पोहोचण्यासाठी विशेषतः पावसाळ्याच्या दिवसात तारेवरची कसरत करावी लागते. रस्त्यांचे जाळे विणणाऱ्या विभागाच्या कार्यालयालाच रस्ता नसणेही विडंबनाच म्हणावे लागेल.

भंडारा जिल्हा रुग्णालयाच्या मागे गंगा विला कॉलनीसमोर सार्वजनिक बांधकाम विभागाचे उपविभागीय अभियंता क्रमांक १ चे कार्यालय आणि राष्ट्रीय महामार्ग विभागाचे कार्यालय आहे. हे कार्यालय समस्येने वेढलेले आहे. या कार्यालयांसमोर ना योग्य रस्ता बांधण्यात आला आहे ना ड्रेनेजची व्यवस्था आहे. पावसाळा येताच येथे चिखल, खड्डे आणि पाण्याचे तळे तयार होतात. कार्यालयात कामासाठी येणाऱ्या सामान्य नागरिक, कंत्राटदार, कर्मचारी आणि कधीकधी वरिष्ठ अधिकाऱ्यांनाही पाणी आणि चिखलातून आत जावे लागते.

हेही वाचा

मूकबधिर विद्यार्थ्याचे अपहरण? आठ दिवसांपासून बेपत्ता; मध्यान्ह सुट्टीनंतर…

परिस्थिती अशी आहे की जिल्ह्यातील डझनभर रस्ते, पूल आणि महामार्ग या कार्यालयांच्या देखरेखीखाली बांधले जातात. कोट्यवधी रुपयांचे कंत्राट दिले जातात, गुणवत्ता तपासली जाते, योजना तयार केल्या जातात, पण जेव्हा त्यांच्या स्वतःच्या कार्यालयात पोहोचण्याचा प्रश्न येतो तेव्हा कोणीही तिथे लक्ष देत नाही. ‘संपूर्ण जिल्ह्याला रस्ते पुरवणारा विभाग स्वतःसाठी रस्ता का बांधू शकला नाही?’ हा प्रश्न लोकांमध्ये चर्चेचा विषय बनला आहे. कार्यालयांसमोर साचलेले पाणी एका लहान तलावासारखे दिसते.

यावर्षी सततच्या पावसामुळे ही समस्या आणखी गंभीर झाली आहे. कार्यालयांसमोर साचलेले पाणी एखाद्या लहान तलावासारखे दिसते. सकाळपासून संध्याकाळपर्यंत प्रवाशांना हातात बूट आणि चप्पल घेऊन किंवा गुडघ्यापर्यंत पाण्यातून चालावे लागते. पाणी साचल्याने घाण पसरते आणि आजार पसरण्याची भीतीही असते. कार्यालयात काम करणाऱ्या कर्मचाऱ्यांनीही या समस्येबद्दल नाराजी व्यक्त केली आहे. अनेक वेळा येणाऱ्या नागरिकांना पाण्यात आणि चिखलात चालणे कठीण होते. ही समस्या नवीन नाही. गेल्या अनेक वर्षांपासून रस्ता बांधणीची मागणी होत आहे, परंतु अद्यापपर्यंत कोणतेही ठोस पाऊल उचलले गेले नाही.

भंडारा जिल्ह्यातील इतर ठिकाणी विकासकामे वेगाने सुरू आहेत, परंतु विभागीय कार्यालयासमोरील दुर्लक्ष आश्चर्यकारक आहे. जिल्हा मुख्यालयाच्या इतक्या महत्त्वाच्या कार्यालयापर्यंत पोहोचण्यासाठी योग्य रस्ता उपलब्ध झाला नाही तर भविष्यात या दुर्लक्षामुळे आणखी गंभीर परिस्थिती निर्माण होऊ शकते, असे स्थानिक लोकांचे म्हणणे आहे.