कामगार दिनी ६० हजार ग्रामपंचायत कर्मचाऱ्यांचे कामबंद आंदोलन, बेमुदत आंदोलनाचा इशारा…

या राज्यव्यापी आंदोलनात राज्यातील कर्मचारी बहुसंख्येने सहभागी झाले आहे. यामुळे राज्यातील हजारो ग्रामपंचायतीचे कामकाज विस्कळीत झाले आहे. बुलढाणा जिल्ह्यासह राज्यातील कमिअधिक साठ हजार ग्रामपंचायत कर्मचारी वेतनश्रेणी, निवृत्ती वेतन उपदान ग्रॅज्युटी लागू करावी, तसेच जीपीएफ ची रक्कम ईपीएफ मध्ये जमा करण्यात यावी, जिल्हा परिषद कर्मचाऱ्यांप्रमाणे ग्रामपंचायत कर्मचाऱ्यांना सेवा लागू करण्यात याव्या या प्रमुख मागण्यांसह अन्य मागण्यासाठी हे आंदोलन करीत आहे.

बुलढाणा जिल्ह्यातही कामबंद आंदोलनाला चांगला प्रतिसाद मिळाला आहे. जिल्ह्यातील ८७० ग्रामपंचायत मधील बहुतेक कर्मचारी आंदोलनात सहभागी झाले आहे. १ मे रोजी अर्थात अंतराष्ट्रीय कामगार दिनी, जिल्ह्यातील ग्रामपंचायत कर्मचाऱ्यांनी दोन दिवसीय काम बंद आंदोलनात सहभागी होत जिल्हा परिषदेसमोर ठिय्या दिला आहे. या ठिकाणच्या आंदोलनात जिल्ह्यातील साठ कर्मचारी सहभागी झाले आहेत. उद्या शुक्रवारी, २ मे रोजी मोठया संख्येने या ठिय्या मध्ये सहभागी होणार आहे.

वेतन वाढीची मागणी प्रलंबीतच

राज्यातील एकूण २७ हजार ९२० ग्रामपंचायत कर्मचारी कार्यरत आहे. यामध्ये सफाई , पाणीपुरवठा , करवसुली कर्मचारी यांच्यासह इतर पदांवरील कर्मचारी अत्यल्प वेतनात काम करत आहेत. गेल्या अनेक वर्षांपासून त्यांच्या वेतनवाढीचा व इतर मागण्यांचा प्रश्न प्रलंबित आहे. कर्मचाऱ्यांनी यापूर्वीही आंदोलने, मोर्चे, मेळावे घेतले. विधिमंडळ अधिवेशनात प्रश्न उपस्थित करून सरकारकडून आश्वासने मिळवली आहेत. मुख्यमंत्री, ग्रामविकास मंत्री, कामगार मंत्री तसेच अनेक आमदारांनी चर्चांमध्ये सहभाग घेतला असला तरी शासनाकडून अद्याप ठोस निर्णय झालेला नाही. त्यामुळे कर्मचाऱ्यांमध्ये तीव्र नाराजी आहे.

कामगार दिन हा हक्कासाठी लढणाऱ्या कामगारांचा सन्मानाचा दिवस असताना, राज्यातील ग्रामपंचायत कर्मचारी अजूनही मूलभूत हक्कांपासून वंचित असल्याची भावना या आंदोलनातून व्यक्त झाली. आंदोलनकर्त्यांनी जर मागण्या तत्काळ मान्य झाल्या नाहीत, तर नजीकच्या काळात बेमुदत आंदोलन करण्याचा इशारा आंदोलन स्थळी प्रसिद्धी माध्यम प्रतिनिधी सोबत बोलतांना दिला आहे.