दिवाळी मिलनातून निवडणुकीसाठी इच्छुकांची साखरपेरणी

२०१७ मध्ये निवडून आलेल्या नगरसेवकांची मुदत ५ मार्च २०२२ रोजी संपल्यानंतर ओबीसी आरक्षणासंबंधी सुरू असलेल्या न्यायालयीन वादामुळे निवडणुका पुढे ढकलण्यात आल्या. त्यानंतर राज्य सरकारने महापालिका आयुक्तांकडे प्रशासक पदाची जबाबदारी सोपवली. मात्र सर्वोच्च न्यायालयाने आता ३१ जानेवारी २०२६ पूर्वी निवडणुका घेण्याचे आदेश दिल्याने, नागपूर महापालिकेची निवडणूक पुढील तीन महिन्यांच्या आत होण्याची शक्यता जवळपास निश्चित झाली आहे. या पार्श्वभूमीवर शहरातील सर्व प्रमुख राजकीय पक्ष आणि अपक्ष इच्छुकांनी प्रचारयंत्रणा सक्रिय केली आहे.

शहरातील विविध भागांत सामाजिक व सांस्कृतिक संस्थांच्या माध्यमातून दिवाळी मिलन सोहळे आयोजित केले जात आहेत. उद्याने, मैदाने, सांस्कृतिक सभागृहे तसेच हाऊसिंग सोसायट्यांमध्ये होत असलेल्या या कार्यक्रमांमध्ये पारंपरिक दिवाळी फराळ, दिवाळी पहाट, गाण्यांचे कार्यक्रम, किल्ले बनवा स्पर्धा यांसारख्या उपक्रमांचा समावेश आहे. या ठिकाणी उपस्थित राहून राजकीय इच्छुक नागरिकांशी प्रत्यक्ष संवाद साधत आहेत. काही ठिकाणी ते घराघरांत भेट देऊन शुभेच्छा देत आहेत, तसेच आपल्या कामगिरीचा आढावा आणि भविष्यातील नियोजन मांडत आहेत.

राज्य सरकार व निवडणूक आयोगानेही तयारीला वेग दिला असून, नागपूर महापालिका निवडणूक एकूण ३८ प्रभाग आणि १५२ जागांसाठी होणार आहे. त्यामुळे प्रत्येक प्रभागात राजकीय हालचालींना वेग आला असून, इच्छुक उमेदवारांनी आपली व्होट बँक मजबूत करण्यासाठी विविध समाजघटकांशी संपर्क वाढवला आहे. काही ठिकाणी पक्षांतर्गत गटबाजीही प्रकर्षाने जाणवू लागली आहे.

दिवाळीच्या गोड वातावरणात सुरू झालेली ही साखरपेरणी आता निवडणुकीच्या रणधुमाळीत परिवर्तित होईल, यात शंका नाही. नागरिकांसाठी हा सण साजरा करण्याचा काळ असला, तरी राजकीय इच्छुकांसाठी हीच खरी तयारीची वेळ ठरली आहे. दिवाळीच्या शुभमुहूर्तावर सुरू झालेला प्रचाराचा हा प्रारंभ पुढील काही आठवड्यांत अधिक जोमाने वाढेल, अशी चिन्हे स्पष्ट दिसत आहेत. नागपूरच्या राजकारणात दिवाळीच्या शुभसंधीवर सुरू झालेल्या या ‘गोड’ स्पर्धेने आगामी निवडणुकीच्या रंगतदार लढतीचे संकेत दिले आहेत.