VIDEO : अमरावतीत नवनीत राणांच्या प्रचारसभेत राडा; माजी खासदारावर हल्ल्याचा प्रयत्न!

मिळालेल्या माहितीनुसार, शनिवारी रात्री दर्यापूर विधानसभा मतदारसंघातील खल्लार या गावात युवा स्वाभिमानचे उमेदवार अरुण बुंदीले यांच्या प्रचारार्थ नवनीत राणा यांची सभा आयोजित करण्यात आली होती. यावेळी नवनीत राणा यांचं भाषण सुरु असताना काही लोकांनी जोरदार घोषणाबाजी करत गोंधळ घालण्यास सुरुवात केली. त्यावेळी युवा स्वाभिमानच्या कार्यकर्त्यांनी त्यांना समजवण्याचा प्रयत्न केला. मात्र, त्यांनी त्यांचं न ऐकता घोषणाबाजी सुरु ठेवली. तेव्हा नवनीत राणा स्वत: त्यांना समजावण्यासाठी जात असतानाही काही लोकांनी त्यांच्या दिशेने खुर्च्या फेकत हल्ला करण्याचा प्रयत्न केला. या हल्ल्यात एक खुर्ची नवनीत राणा यांच्या अंगरक्षकालाही लागली.

हेही वाचा – कमळ म्हणजेच पाना…नवनीत राणाच्या नवीन डावाने महायुतीत ठिणगी…,

यासंदर्भात बोलताना नवनीत राणा म्हणाल्या, खल्लारमध्ये आमची सभा सुरू होती. आम्ही शांततेत प्रचार करत होतो. माझं भाषण सुरु असताना काही लोकांनी गोंधळ घालण्यास सुरूवात केली. माझ्या दिशेने बघून घाणेरड्या पद्धतीने शिवीगाळ करण्यात आली. आमच्या कार्यकर्त्यांनी त्यांना समजवण्याचा प्रयत्न केला, त्यावेळी त्यांनी त्यांच्यावर खुर्च्या फेकल्या. भाषण झाल्यानंतर मी स्वत: त्यांच्याकडे समजावण्यासाठी गेली. मात्र, त्या लोकांनी माझ्यावरही खुर्च्या फेकण्याचा प्रयत्न केला.

हेही वाचा – “राणा दाम्‍पत्‍याला अमरावती जिल्‍ह्यात भाजप संपवायची आहे”,बच्‍चू कडू यांची टीका

पुढे बोलताना, या घटनेनंतर आम्ही गुन्हा दाखल केला असून हल्ला करणाऱ्यांना तत्काळ अटक करावी, अशी मागणी त्यांनी केली. तसेच जर सकाळी १० वाजेपर्यंत त्यांना अटक झाली नाही, तर अमरावतीत वेगळं चित्र बघायला मिळेल. आम्ही सगळेच रस्त्यावर उतरू, असा इशाराही नवनीत राणा यांनी दिला. दरम्यान, याप्रकरणी आता २५ जणांवर गुन्हा दाखल करण्यात आल्याची माहिती आहे.