नागपूर : रामदास पेठ येथील मेडिट्रिना रुग्णालयात स्थापनेपासूनच वादात आहे. गेल्या अनेक वर्षापासून सतत चर्चत राहणारे संचालक आता पुन्हा एकदा वादात अडकले आहेत. मनमानी कारभारातून कोट्यवधी रुपयांचा अपहार केल्याप्रकरणात संचालक डॉ.समीर पालतेवार, सोनाली पालतेवार यांच्यासह १८ जणांविरोधात सिताबर्डी पोलिसांनी गुरुवारी फसवणुकीचा आणखी एक गुन्हा दाखल केला.
यावेळी डिजिटल मार्केटिंग-जाहिरातीच्या नावाखाली हा गैरप्रकार झाल्याची तक्रार रुग्णालय भागिदारानेच केली आहे. धक्कादायक बाब म्हणजे रुग्णालयाविरोधात झालेली ही फसवणुकीची पहिलीच घटना नाही. या आधी २ वेळी असाच फसवणूकेचे गुन्हे दाखल झाले आहेत. यापूर्वी २०१९, २०२१ आणि आता २०२५ मध्ये हा प्रकार चव्हाट्यावर आला आहे. त्यामुळे पांढरपेशी, उच्चशिक्षीत संघटित गुन्हेगारीचा मुद्दा ऐरणीवर आला आहे.
व्यवसायाने चार्टर्ड अकाऊंटंट असलेले गणेश रामचंद्र चक्करवार (६५, कॅनल रोड, रामदासपेठ) यांनीच ही तक्रार दाखल केली आहे. विशेष म्हणजे ते याच रुग्णालयाच्या फाऊंडर मेंबर पैकी एक आहेत. त्यांनी केलेल्या तक्रारी नुसार २००६ मध्ये चक्करवार यांनी डॉ.पालतेवार व इतरांसोबत व्हीआरजी हेल्थ केअर प्रा.लि.कंपनी सुरू केली होती. यातून २०१२ मध्ये मेडीट्रीना रुग्णालयाची स्थापना झाली. दरम्यान २०१६ मध्ये इतर लोक बाहेर पडले व चक्करवार तसेच डॉ.पालतेवार हेच ५०-५० टक्क्यांचे भागीदार झाले.
कंपनीच्या नावावर नवीन इस्पितळाचे बांधकाम करण्यासाठी नियमांनुसार डॉक्टरकडे ६७ टक्के शेअर आवश्यक असल्याचे डॉ.पालतेवारने सांगितले. त्यामुळे चक्करवार यांनी १७ टक्के शेअर्स तात्पुरते बुक व्हॅल्युवर ट्रान्सफर करत सोनाली पालतेवारला अतिरिक्त संचालक बनविले. मात्र त्यानंतर डॉ.पालतेवारांनी मनमर्जीने सुरु केली. पालतेवार दांपत्याने मुलगा निनादसोबत ऑब्व्हिएट हेल्थकेअर प्रा.लि. ही कंपनी स्थापन केली. त्यांनी २०२०-२१ मध्ये मेडिट्रिनाच्या खात्यातून दोन, २०२१-२२ मध्ये २.९१ , २०२२-२३ मध्ये ३.३६ व २०२३-२४ मध्ये ३.१३ असे एकूण ११.४१ कोटी रुपये काढले. याची कुठलीही कल्पना आपल्याला दिली गेली नाही , असे चक्करवार यांचे म्हणणे आहे. खोटी बिले तयार करून करोडो रूपये कंपनीच्या बँक खात्यातुन काढले. चक्करवार यांनी वार्षिक अहवालाची पाहणी केली असता डिजिटल मार्केटिंग व जाहिरातींच्या नावाखाली बनावट बिले तयार केल्याची बाब समोर आली.
हे देखील सह आरोपी…
मेडिट्रिनाचे अंकेक्षण अधिकारी अर्पण पांडेसह किशोर पांडेच्, अभिषेक पांडे ॲबस्ट्रॅक्ट आयटी ग्रुप, आकाश केदारची कंपनी एके हेल्थकेअर सर्व्हिसेस, मुकेश बडवाईकची एमबी हेल्थ केअर सर्व्हिसेस, वैशाली बडवाईक, तृप्ती घोडे, रिता बडवाईक, कल्याणी बडवाईक, नईम दिवाण, सर्वेश ढोमणे, प्रियंका ढोमणे यांच्या पी.एस.हेल्थ केअर सर्व्हिसेस, अलाईड हेल्थकेअर सर्व्हिसेसच्या खात्यात बेकायदेशीर मार्गे कोट्यवधी जमा करण्यात आले. चक्करवार यांच्या तक्रारीवरून या सर्वांविरोधात गुन्हा दाखल करत त्यांना पोलिसांनी सह आरोपी केले आहे.
