नागपूर : वोट चोर गद्दी छोड यात्रेपूर्वी कामठी येथील डॉ. बाबासाहेब आंबेडकर चौकात काँग्रेसकडून संविधानाचा जागर करण्यात आला. या चौकात काँग्रेस नेते कार्यकर्ते पदाधिकारी मोठ्या प्रमाणात गोळा होऊ लागले आहेत. कार्यकर्त्यांच्या हाती काँग्रेसचे झेंडे आणि वोट चोर गद्दी छोड असे लिहलेले फलक आहेत. तसेच कार्यकर्ते वोट चोर गद्दी छोड अशा घोषणा देत आहेत. डॉ. बाबासाहेब आंबेडकर चौकातून ही पदयात्रा कृषी उत्पन्न बाजार समिती येथे आयोजित मेळावाच्या ठिकाणी जाणार आहे.
काँग्रेस नेते राहुल गांधी यांनी ज्या मतदारसंघाचा उल्लेख करत मतचोरी आरोप भाजप आणि निवडणूक आयोगावर सर्वप्रथम केला. त्या कामठी विधानसभा मतदारसंघातून प्रदेश काँग्रेस ‘व्होट चोर गद्दी छोड’ अभियानाला सुरवात करत आहे. प्रदेश काँग्रेसची जाहीरसभा आज कामठी येथे आयोजित करण्यात आली आहे.
महाराष्ट्र विधानसभा निवडणुकीतल्या निवडणुकीत मतचोरी झाल्याचा आरोप राहुल गांधी यांनी एका लेखात केला. त्यात कामठी मतदारसंघाचे उदाहरण दिले होते. त्यानंतर राहुल गांधी यांनी कर्नाटकच्या महादेवपूरा येथील मतचोरीचे पॉवर पॉईन्ट प्रेझेंटेशन दिले. आता ते बिहारमधील एसआयआरच्या विरोधात व्होटअधिकार यात्रेवर आहेत. बिहारामध्ये राहुल गांधी यांच्या यात्रेला उत्तम प्रतिसाद मिळत आहे. देशभरात भाजप आणि निवडणूक यांचे साटेलोटे आणि मतचोरी मुद्दा तापण्याची रणनिती काँग्रेसने आखली आहे. महाराष्ट्रात देखील विभागीय पातळीवर ‘व्होट चोर गद्दी छोड’ नारा घराघरात पोहोचवण्यासाठी काँग्रेसपक्ष विभागीय आणि जिल्हा स्तरावर सभा, हस्ताक्षर मोहीम, मशाल यात्रा काढणार आहे.
विधानसभा निवडणुकीची अंतिम मतदार यादी जाहीर झाली. मतदारसंघात ३५ हजार मतदार वाढले होते. यात १२ हजार मतदार शेवटच्या तीन दिवसात वाढल्याचा आरोप विधानसभा मतदारसंघातील पराभूत उमेदवार सुरेश भोयर यांनी केला होता.
महाराष्ट्रात २०१९ च्या विधानसभा निवडणुका आणि लोकसभा निवडणुकीदरम्यान २०२४ मध्ये ३२ लाख मतदार जोडले गेले. तथापि, २०२४ च्या लोकसभा निवडणुकीत (महाविकास आघाडी) विजयी झालेल्या आणि विधानसभा निवडणुकांमधील पाच महिन्यांच्या कालावधीत ३९ लाख मतदार जोडले गेले. महाराष्ट्रात राज्यातील एकूण मतदार लोकसंख्येपेक्षा जास्त मतदार का आहेत? महाराष्ट्रात अचानक मतदार का निर्माण झाले आहेत. निवडणूक आयोगाने या प्रश्नांची उत्तरे मागूनही दिलेली नाहीत, असा आरोप राहुल गांधी यांनी केला होता.
