जिवंतपणी स्वच्छता दूत… जग सोडताना देवदूत.. स्वच्छता कर्मचाऱ्यांच्या अवयवदानातून…

चंद्रमणी जामगडे (६६), रा. बिडगाव, ता. कामठी, जि. नागपूर हे नागपूर महानगरपालिकेतील माजी सफाई कर्मचारी होते. त्यांच्या कुटुंबात पत्नी नंदा (५८), मुलगे विरू (३७) आणि पंकज (३५) आहेत. लक्ष्मीपूजनाच्या दिवशी म्हणजेच २१ ऑक्टोबर रोजी चंद्रमणी यांना अचानक भोवळ आल्याने ते घरातच कोसळले. कुटुंबियांनी तातडीने त्यांना उपचारासाठी नागपुरातील लकडगंज येथील न्यू इरा रुग्णालयात दाखल केले. विविध तपासण्यांमध्ये त्यांच्या मेंदूमध्ये रक्तस्राव झाल्याचे निदान झाले. उपचारांना प्रतिसाद न मिळाल्याने पुढील तपासणीत त्यांचा मेंदूमृत्यू झाल्याचे स्पष्ट झाले.

न्यू इरा रुग्णालयातील समन्वयक डॉ. अश्विनी चौधरी यांनी कुटुंबीयांना परिस्थितीची सविस्तर माहिती देत अवयवदानाविषयी समुपदेशन केले. चंद्रमणींचे मुले विरू आणि पंकज तसेच इतर कुटुंबीयांनी, वडिलांचे काही भाग इतरांच्या शरीरात जिवंत राहू शकतात, या भावनेने अवयवदानाला संमती दिली. त्यानंतर विभागीय अवयव प्रत्यारोपण समितीला माहिती देण्यात आली. समितीचे समन्वयकांनी संपूर्ण प्रक्रिया पूर्ण केली. गुरुवारी चंद्रमणींचे यकृत, दोन मूत्रपिंड आणि दोन डोळे दान करण्यात आले. त्यामुळे पाच कुटुंबांना नवजीवन लाभले. या उपक्रमात डॉ. निलेश अग्रवाल, डॉ. आनंद संचेती, डॉ. पराग मुन, साहिल बंसल, डॉ. विवेक देशपांडे तसेच न्यू इरा रुग्णालयातील वरिष्ठ व कनिष्ठ डॉक्टर आणि कर्मचारीवर्ग यांनी महत्त्वाची भूमिका बजावली.

भाऊबीजेला दोन महिलांसाठी ठरला ‘भाऊ’

भाऊबीजेच्या दिवशी चंद्रमणी यांचे यकृत न्यू इरा रुग्णालयातील ६५ वर्षीय महिलेच्या* शरीरात प्रत्यारोपित करण्यात आले. एक मूत्रपिंड एम्स, नागपूर येथील ५३ वर्षीय महिलेला तर दुसरे मूत्रपिंड न्यू इरा रुग्णालयातील ५७ वर्षीय पुरुषाला देण्यात आले. दोन्ही डोळे (बुबुळ) महात्मे नेत्रपेढीला देण्यात आले. अशा रीतीने, दोन महिलांना नवजीवन देत चंद्रमणी जामगडे यांनी या दिवाळीत खऱ्या अर्थाने ‘भाऊबीजेचा भाऊ’ बनून मानवतेचा दीप प्रज्वलित केला.

अवयवदान वाढण्याची गरज…

नागपूरसह देहभारात आजही गरजेच्या तुलनेत खूप कमी अवयवदान होते. त्यामुळे अनेकांना अवयव उपलब्ध होत नसल्याने जीव गमवावा लागतो. अवयव दनाने अनेकांचे जीव वाचणे शक्य आहे.