भंडारा : दुसऱ्या प्रियकरासोबत हत्येचा कट रचून प्रेयसीनेच पहिल्या प्रियकराचा घात केला. तिघांनी मिळून नयनचा गळा आवळून त्याची हत्या केली. एवढेच नाही तर हत्येनंतर रात्री हे दोघेही तरुण मद्यधुंद अवस्थेत नयनच्या मृतदेहाची विल्हेवाट लावण्यासाठी घटनास्थळी आले. त्रिशंकू प्रेम प्रकरणातूनच नयनची हत्या झाल्याचे पोलीस तपासात निष्पन्न झाले असून या हत्या प्रकरणात १९ वर्षीय प्रेयसीसह दोन तरुणांना पोलिसांनी अटक केली आहे.
नयन मुकेश खोडपे, वय १९ वर्ष रा. पांढराबोडी याचा मृतदेह ३० नोव्हेंबर रोजी सकाळी नाल्यात सापडल्यानंतर पोलिसांनी तपासाची चक्रे वेगाने फिरवली. नातेवाईकांच्या सांगण्यावरून काही संशयित तरुणांना ताब्यात घेण्यात आले. संशयितांची कसून चौकशी केली असता त्यांनी हत्या केल्याचे कबूल केले. या हत्या प्रकरणात मुख्य आरोपी मंथन अशोक ठाकरे, वय १९ वर्ष रा.भोजपुर, मित्र साहिल शरद धांडे, वय १९ रा.ठाणा पेट्रोल पंप व प्रेयसी वय १९ रा. बीड सितेपार या तिघांना पोलिसांनी अटक केली आहे. प्रेयसी आणि माझ्यामध्ये येऊ नकोस असे धमकावत पंधरा दिवसांपूर्वी मंथनने मृतक नयनसोबत पांढराबोडी गावालगत भांडण केले होते. त्यानंतर २७ नोव्हेंबरपासून नयन बेपत्ता असल्याची तक्रार त्याच्या कुटुंबीयांनी केली होती.
दिनांक २७ नोव्हेंबरला प्रेयसीने नयनला फोन करून भंडारा येथे बोलावून घेतले. तेथून नयन मोटासायकलने प्रेयसीला नांदोरा झीरी या पर्यटनस्थळी घेऊन गेला. दोघेही गप्पा गोष्टी करीत असताना दुपारी मंथन व साहिल एका मोटासायकलने तेथे आले. मंथनने नयनसोबत भांडण करून जबर मारहाण केली. एवढ्यावर ते थांबले नाही तर एका दुप्पट्ट्याने नयनचा गळा आवळून झाडाला बांधून त्याला मारहाण केली. नयनचा मृतदेह तसाच सोडून ते तिघेही ट्रीपल सीट भंडाऱ्याला आले. हत्येच्या रात्री आरोपी मंथन आणि साहिल दोघेही मित्र मद्यधुंद अवस्थेत पुन्हा नांदोरा झीरी येथे आले. झाडाखाली पडून असलेल्या नयनचा मृतदेह उचलून पुरावा नष्ट करण्याच्या हेतूने पंडित नाल्यातील लहान पुलावरून गोसे धरणाच्या बॅक वॉटरच्या पाण्यात फेकून दिला. त्यानंतर दोघांनी नयनची मोटासायकल भंडारा तहसील कार्यालयाजवळील मोडक्या इमारतीजवळ फेकून दिली. मृतक नयनच्या नातेवाईकांनी सुरुवातीलाच मंथनवर संशय व्यक्त केला. त्या दिशेने तपास करीत पोलिसांनी मंथनला ताब्यात घेतले.
“मी एकाला आताच टपकवले आहे”…
नयनची हत्या केल्यानंतर दुसरा आरोपी साहील शरद धांडे हा सायंकाळी नशा करून ठाणा पेट्रोल पंप येथील पान टपरीवर आला. बेधुंद नशेत तो जोर जोराने ओरडून “मैने अभी अभी एक जण को टपकाया है” असे सांगू लागला. मात्र उपस्थितांनी त्याच्याकडे दुर्लक्ष केले. दुसऱ्या दिवशी नयनच्या खून प्रकरणाच्या बातम्या झळकल्या त्यानंतर साहिलच्या हत्येबाबत बोलल्याच्या चर्चा ठाणा पेट्रोल पंप येथे रंगल्या. दरम्यान पोलिसांनी साहिलला सकाळीच त्यांच्या घरून अटक केली. व युवती आरोपीस बीड सीतेपार येथून अटक करून गुन्हा ३०५/२३ कलम ३०२,२०१ दाखल करून पुढील तपासासाठी अटक केली. पुढील तपास ठाणेदार सुधिर बोरकुटे करीत आहे.
