बुलढाणा: जुना वाद उकरून काढत एका युवकाने धारदार लोखंडी ‘कटर’ने सपासप वार केल्याने तिघे बाप लेक जखमी झाले. यातील दोघेजण गंभीर जखमी झाले असून त्यांच्यावर बुलढाणा येथील जिल्हा सामान्य रुग्णालयात उपचार सुरु आहे.
बुलढाणा जिल्ह्यातील मोठी बाजारपेठ असलेल्या चिखली शहरातील सुभाष नगर परिसरात काल मंगळवारी, ६ मे रोजी रात्री साडेदहा च्या सुमारास हा थरारक घटनाक्रम घडला. या प्रकरणी काल रात्री साडेबारा वाजताच्या सुमारास चिखली पोलीस ठाण्यात गुन्हा दाखल करण्यात आला. या घटनेमुळे काल रात्री खळबळ उडाली. सुभाष नगर, चिखली पोलीस ठाणे परिसरात नातेवाईक, बघ्यांची एकच गर्दी उसळली होती.
शेख जाबाज शेख सुलेमान बागवान (राहणार सुभाष नगर, चिखली पंचायत समिती कार्यलया मागे, चिखली) असे आरोपीचे नाव नाव आहे. जखमी शेख जुनेद शेख गणी बागवान (वय ३२, राहणार सुभाष नगर, चिखली) यांनी तक्रार दिली. यावरूनआरोपी शेख जाबाज विरुद्ध भारतीय न्याय संहितेच्या कलम ११५ (२),११८ (१),३५१ (३), ३५२ नुसार गुन्हा दाखल करण्यात आला आहे. या हल्ल्याचा तपास चिखली पोलीस ठाण्याचे पोलीस उप निरीक्ष नितीनसिंह चौहान करीत आहे.
काल रात्री दहा वाजता जुनेद चा भाऊ घरासमोर बसलेला असताना जाबाज तिथे आला. जुन्या कारणावरून शिवीगाळ करू लागला त्यास शिवीगाळ का करतो अशी विचारणा केली असता त्याने जुनेदच्या भावाला लोटपाट केली. आरडा ओरड झाल्याने घरातून बाहेर आलेल्या जुनेद याने सोडवासोडवि केली. यावर जाबाज याने त्याचे खिशातील लोखंडी कटर काढून जुनेदच्या छातीत, काखेत,व भावाला चेहऱ्यावर, पोटावर, आणि वडील शेख गणी बागवान यांच्या पोटावर कटर ने वार केले. या तिघे बापलेक जखमी झाले.
या हल्ल्यात गंभीर झालेल्या जुनेद चे वडील व भावाला उपचारासाठी बुलढाणा येथे हलवण्यात आले. आरोपी शेख जाबाज यास चिखली पोलिसांनी ताब्यात घेतले. त्याच्या विरुद्ध गुन्हा दाखलं करुन अटक करण्यात आली आहे. या घटनेमुळे सुभाष नगर परिसरासह चिखली शहरात खळबळ उडाली आहे.
