अकोला : शहरातील वराहांमध्ये ‘आफ्रिकन स्वाईन फिवर’ रोगाचा प्रादुर्भाव आढळला आहे. त्यानुसार जिल्हाधिकारी अजित कुंभार यांनी प्रतिबंधात्मक आदेश जारी केला. शहरात वराहांचा मोठ्या प्रमाणावर मृत्यू होत असल्याचे आढळून आले. त्यांचे नमुने भोपाळ येथील ‘नॅशनल इन्स्टिट्यूट ऑफ हाय सिक्युरिटी ॲनिमल डिसीज’ यांना पाठविण्यात आले. त्याचा अहवाल सकारात्मक आला आहे. त्यामुळे प्रतिबंधात्मक आदेश जारी केले आहेत. त्या आदेशानुसार संक्रमणस्थळाच्या एक किलोमीटर परिघातील क्षेत्र संनियंत्रण क्षेत्र म्हणून घोषित करण्यात आले आहे.
या परिसरातील सर्व वराहांचे ‘कलिंग’ करून त्यांची विल्हेवाट शास्त्रीय पद्धतीने लावण्याचे व परिसराचे निर्जंतुकीकरण करण्याचे आदेश आहेत. या क्षेत्रात सक्रिय संनियंत्रण व्यापक प्रमाणात व सुयोग्य जैवसुरक्षा उपाययोजना कराव्यात. वराहाच्या मांसाची विक्री करणाऱ्या आस्थापनांची नोंदणी पूर्ण करून स्थानिक पशुवैद्यकीय अधिकाऱ्यांनी नियमितपणे भेटी देऊन नियंत्रण ठेवावे. मोकाट पद्धतीने होणारे वराहपालन टाळावे. निरोगी वराहाचा घरगुती व कत्तलखान्यातील कच्चे मांस उपपदार्थ तसेच कचरा यांच्याशी संपर्क येऊ देऊ नये.
हेही वाचा >>> यवतमाळ जिल्ह्यात ‘शिक्षण चेतना’ उपक्रम; ४६ मॉडेल स्कूलची निर्मिती होणार
वराह पालन केंद्रातील तसेच मांस विक्री केंद्रातील कचरा एकत्रित साठवू नये. सर्व कचरा नष्ट करावा किंवा सार्वजनिक स्वच्छता व्यवस्थापनाकडून शास्त्रोक्तदृष्ट्या त्याची विल्हेवाट लावावी. वराह पालन करणारे पशुपालक व या व्यवसायाशी संबंधित व्यक्तींमध्ये जागृती करावी. शेजारच्या राज्यातील वराहांचा अनधिकृत प्रवेश होऊ नये यासाठी पशुसंवर्धन विभागाने पोलीस व चेक नाक्यांशी समन्वय ठेवावा, असे आदेशात नमूद केले आहे.
