भंडारा : आठवडाभरापूर्वी भंडाऱ्याचे जिल्हाधिकारी संजय कोलते यांची तडकाफडकी बदली झाल्यानंतर आता अचानक जिल्ह्याचे पालकमंत्री संजय सावकारे यांना पदावरून पाय उतार केल्यामुळे राजकीय वर्तुळात चर्चांना उधाण आले आहे.भाजपचे नेते आणि राज्याचे वस्त्रोद्योग मंत्री संजय सावकारे हे भंडारा जिल्ह्याचे पालकमंत्री होते. मात्र, सोमवारी रात्री अचानक भंडारा जिल्ह्याचे पालकमंत्री बदलण्यात आल्याचा शासन आदेश जारी झाला.
गृहराज्यमंत्री पंकज भोयर हे आता भंडारा जिल्ह्याचे नवे पालकमंत्री असतील. तर संजय सावकारे यांच्याकडे बुलढाणा जिल्ह्याच्या सह पालकमंत्रीपदाची जबाबदारी देण्यात आली आहे. या निर्णयामागे भंडाऱ्यात संजय सावकारे यांच्याबद्दल असलेली तीव्र नाराजी कारणीभूत असल्याचे सांगितले जाते. संजय सावकारे हे भंडाऱ्याचे पालकमंत्री असले तरी ते फक्त १५ ऑगस्ट, २६ जानेवारी, जिल्हा नियोजनाच्या आढावा बैठक याव्यतिरिक्त जिल्ह्यात फारसे फिरकत नव्हते. त्यामुळे नागरिकांच्या अनेक समस्या प्रलंबित होत्या.
या सगळ्यामुळे भंडाऱ्यातील नागरिकांकडून आम्हाला स्थनिक पालकमंत्री हवा, अशी मागणी केली जात होती. त्यामुळे संजय सावकारे यांची उचलबांगडी करुन त्यांच्याजागी पंकज भोयर यांना भंडाऱ्याचे पालकमंत्री म्हणून नेमण्यात आले आहे. पंकज भोयर हे लगतच्या वर्धा जिल्ह्यातील आहे व त्या जिल्ह्याचे पालकमंत्री आहेत. आगामी स्थानिक स्वराज्य संस्थांच्या निवडणुका डोळ्यासमोर ठेवून सरकारने पंकज भोयर यांच्यावर भंडाऱ्याच्या पालकमंत्रीपदाची जबाबदारी दिल्याचे बोलले जात आहे.
भंडाऱ्यात पालकमंत्री का बदलला?
पालकमंत्री सावकारे म्हणून ते पूर्णकाळ उपलब्ध नसायचे, ‘झेंडा टू झेंडा’ ते भंडाऱ्यात येतं असे, भंडाऱ्यात निर्माण झालेल्या पूरपरिस्थितीनंतरही ते भंडाऱ्यात आले नव्हते, यामुळे नुकसानग्रस्त शेतकऱ्यांमध्ये पालकमंत्र्यांच्या विरोधात प्रचंड रोष निर्माण झाला होता, भंडारा जिल्ह्याची जाण असणाऱ्या जवळच्या जिल्ह्यातील मंत्र्यांना पालकमंत्री करावा, अशी नागरिकांची मागणी होती.
