मसाजच्या नावावर देहव्यापार, नागपुरातील ‘डीलाईट स्पा’मध्ये पाच तरुणी…

दक्षिण अंबाझरी मार्गावर श्रद्धानंदपेठमध्ये ‘डिलाईट स्पा’ नावाने मसाज सेंटर सुरु होते. या मसाज सेंटरमध्ये आसाम, नागालँड, अरुणाचल प्रदेश, सिक्कीम आणि मणिपूर राज्यातील तरुणी या स्पामध्ये मसाजची कामे करीत होत्या. मात्र, मसाजच्या आड तरुणींकडून स्पा सेंटरचा मालक रहानुद्दीन हा देहव्यापार करवून घेत होता. पाचही मुलींची राहण्याची व्यवस्था स्पामधील एका खोलीत करण्यात आली होती. त्यामुळे त्या तरुणींना ग्राहक आल्यानंतर देहव्यापारासाठी नकार देता येत नव्हता.

गेल्या दोन वर्षांपासून तरुणींचे लैंगिक शोषण या मसाज सेंटरमध्ये सुरु होते. मसाज पार्लरवर दिवसेंदिवस आंबटशौकीनांची गर्दी वाढत होती. त्यामुळे शेजारी असलेल्या नागरिकांना संशय आला. यासोबतच काही पोलीस कर्मचारीसुद्धा तेथे भेटी देत होते. त्यामुळे नागरिकांनी थेट पोलीस उपायुक्तांना देहव्यापाराच्या अड्ड्याची माहिती दिली. त्यामुळे गुन्हे शाखेचे पोलीस निरीक्षक अमोल देशमुख यांच्या पथकाने मंगळवारी सायंकाळी छापा घातला.

या छाप्यात पाचही तरुणींना अर्धनग्नावस्थेत आढळून आल्या. तसेच एका आंबटशौकीन ग्राहकाशी रिजूल अली हा सौदेबाजी करीत होता. ग्राहकासमोर तरुणी उभ्या करण्यात आल्या होत्या. पोलिसांनी रिजूलला अटक केली तर पाचही तरुणींना ताब्यात घेऊन त्यांची महिला सुधारगृहात रवानगी केली.

पोलिसांशी ‘अर्थपूर्ण’ संबंध

देहव्यापारात सहभागी असलेल्या तरुणी १८ ते २५ वयोगटातील असून त्यांना नोकरीचे आमिष दाखवून नागपुरात आणले होते. तरुणींकडून बळजबरी देहव्यापार करवून घेण्यात येत होता. स्पा सेंटरचा मालक रहानुद्दीन याचे एका पथकातील पोलीस कर्मचाऱ्यांशी ‘अर्थपूर्ण’ होते. त्यामुळे आतापर्यंत या मसाज पार्लरवर छापा पडला नव्हता. मात्र, गुन्हे शाखेच्या युनिटने अचानक छापा घातल्यामुळे काही पोलीस कर्मचारी अडचणीत आले आहेत, अशी चर्चा आहे.

तरुणींचे आर्थिक शोषण

‘डिलाईट स्पा’चा मालक आणि व्यवस्थापक प्रत्येक आंबटशौकीन ग्राहकांकडून पाच ते सात हजार रुपये घेत होता. मात्र, त्यापैकी तरुणींना केवळ १ हजार रुपये देत होता. तसेच त्यांनी देहव्यापार करण्यास नकार दिल्यास त्यांना मारहाणही करीत होता. पाचही तरुणींच्या आईवडिलांची आर्थिक स्थिती बेताची आहे. त्यामुळे तरुणी नोकरीच्या आमिषाने नागपुरात आल्या होत्या. मात्र, येथे त्यांच्याकडूब बळजबरी देहव्यापार करवून घेण्यात येत होता.