अकोला : श्रावण पौर्णिमेच्या दिवशी साजरा होणारा रक्षाबंधनाचा सण हा भाऊ–बहिणीच्या पवित्र प्रेमाचं प्रतीक आहे. हिंदू पंचांगानुसार रक्षाबंधन हा सण श्रावण महिन्यातील पौर्णिमेच्या तिथीला साजरा केला जातो. यंदा पौर्णिमा तिथी ८ ऑगस्ट दुपारपासून सुरू होईल, रक्षाबंधन ८ तारखेला साजरे होणार की ९ तारखेला या संभ्रमात अनेक जण आहेत. तर यंदा शनिवार ९ ऑगस्ट रोजी रक्षाबंधन साजरे करण्यात येणार असून शुभमुहूर्त दुपारी १.२४ पूर्वी आहे, अशी माहिती पुरोहित संघाकडून देण्यात आली.
अकोला पुरोहित संघाची सभा शहर कोतवाली जवळ श्री बालाजी मंदिरात घेण्यात आली. यावेळी सिंधू ग्रंथांचा आधार घेऊन रक्षाबंधनाचे मुहूर्त ठरवण्यात आले. नारळी पौर्णिमा तिथी प्रारंभ ८ ऑगस्ट दुपारी २ वाजून १२ पौर्णिमा तिथी समाप्ती ९ ऑगस्ट दुपारी १ वाजून २१ मिनिटांपर्यंत आहे. उदय तिथीनुसार ९ ऑगस्ट रोजी रक्षाबंधन साजरे होणार आहे.
यंदाच्या राखीपौर्णिमेला भद्राकाळ असणार नाही. त्यामुळे निश्चित होऊन राखी बांधावी. भद्राकाळात राखी न बांधण्याचे कारण म्हणजे पौराणिक कथेनुसार रावणाच्या बहिणीने त्याला याच भद्रकाळात राखी बांधल्याने त्याचा विनाश कसा झाला, असे म्हटले जाते. त्यामुळे उदंड भावाच्या सुखी व आयुष्यासाठी भद्रकाळात राखी बांधली जात नाही. रक्षाबंधनाचा म्हणजेच राखी बांधण्याचा शुभमुहूर्त असतो, तसेच राखी देखील विशिष्ट काळाने काढली जावी, असे मानतात. बहिण आपल्या भावाच्या उजव्या हातावर राखी बांधते, यामागे ती भावना असते की भाऊ समृद्ध होवो आणि तिचं रक्षण करो, हाच या सणामागचा गाभा आहे. बहिणीने भावाच्या कल्याणासाठी आणि भावाने बहिणीच्या रक्षणासाठी प्रार्थना करावी, अशी प्रथा आहे.
रक्षाबंधनाचे असे आहेत शुभमुहूर्त
रक्षाबंधन मुहूर्त सकाळी ५:४७ वाजता सुरू होऊन दुपारी १:२४ पर्यंत असेल, सात तास १० मिनिटांचा मुहूर्त आहे. सकाळी ७.३७ पासून ९.१४ पर्यंत शुभ मुहूर्त आहे. चंचल दुपारी १२.२७ पासून १.२४ पर्यंत, अभिजीत दुपारी १२.३ पासून १२.५१ पर्यंत रक्षाबंधन संपन्न करू शकता. पौर्णिमा तिथी दुपारी १.२४ पर्यंत राहील. लोकपरंपरेनुसार कुल प्रथेनुसार दुपारी १.२४ नंतरही राखी बांधू शकता. सभेत पं. रतन तिवारी, भैरव शर्मा, सुमित तिवारी, लाला तिवारी, रजनीकांत जाडा, श्याम अवस्थी, प्रमोद तिवारी व पं. रवी कुमार शर्मा उपस्थित होते.
