काँग्रेसच्या अधिवेशनात आरएसएसच्या डॉ. हेडगेवारांनी संपूर्ण स्वातंत्र्याचा प्रस्ताव मांडला होता, संघाचा नवीन दावा 

काँग्रेसच्या लाहोर येथे झालेल्या १९३० च्या अधिवेशनात संपूर्ण स्वातंत्र्याच्या मागणीचा ठराव मान्य करण्यात आला होता. मात्र, राष्ट्रीय स्वयंसेवक संघाचे पहिले सरसंघचालक डॉ. केशव हेडगेवार १९२० मध्ये नागपूर येथे झालेल्या काँग्रेसच्या अधिवेशनात सर्वातआधी संपूर्ण स्वातंत्र्याचा ठराव मांडला होता, असा दावा राष्ट्रीय स्वयंसेवक संघाचे विदर्भ प्रांत कार्यवाह अतुल मोघे यांनी केला.मोघे म्हणाले, काँग्रेसच्या १९३०च्या अधिवेशनात संपूर्ण स्वातंत्र्याचा ठराव मान्य झाला ती तारीख २६ जानेवारी होती. याची आठवण राहावी म्हणूनच त्याच दिवशी भारताने संविधानाचा स्वीकार केला. स्वातंत्र्याच्या पूर्वसंध्येला बोलताना मागील ७८ वर्षांच्या प्रवासाची आवठण करणे आवश्यक आहे.

१९२० मध्ये डॉ. हेडगेवार हे काँग्रेसचे सदस्य होते. १९२० च्या अधिवेशनात ते सक्रिय कार्यकर्ते होते. यावेळी त्यांनी दोन प्रस्ताव मांडले होते. यात पहिला प्रस्ताव हा संपूर्ण स्वातंत्र्याचा होता. तर दुसरा प्रस्ताव हा जगाला भांडवलशाही क्षेत्राच्या बाहेर काढण्यासाठी भारताची भूमिका महत्त्वाची राहणार असून आपण त्याचे नेतृत्व करावे, असा होता. डॉ. हेडगेवारांनी १९२० मध्ये मांडलेला प्रस्ताव काँग्रेसने १९३०च्या अधिवेशनात मान्य केला, असेही मोघे म्हणाले. येणाऱ्या काळात भारताला जगाचे नेतृत्व करावे लागणार असून अखंड भारत होणार असल्याचे सुतोवाचही अतुल मोघे यांनी केले. यासाठी प्राध्यापकांची भूमिका महत्त्वाची आहे. प्राध्यापकाने शिकवत असताना जागतिक दृष्टिकोन डोळ्यांसमोर ठेवायला हवा. आज जगामध्ये व्यापारावरून वाद आहे. भारतावर आपले वर्चस्व थोपवण्याचा प्रयत्न काही देश करत आहेत. मात्र, यासाठी अमेरिका आणि रशियाला दोष देण्यात काहीही अर्थ नाही. त्यांचे राजकारण ते करतात. कुणाचा वचपा काढायचा किंवा एखाद्या देशाविषयी मुद्दाम काही कुरापती करणे ही भारतीय संस्कृती नाही. खरी संस्कृती जपणारा देश म्हणजे भारत ही आपली ओळख आहे. आपण हा सांस्कृतिक ठेवा जपला आहे. वसुधैव कुटुंबकम् हे म्हणणारा जगात फक्त भारत देश आहे, असेही ते म्हणाले.