नागपूर : पर्स चोरणाऱ्या महिलांसह एसटी थेट पोलीस ठाण्यात, आरडाओरड होताच वाहतूक पोलीस धावले

गुरप्रीतकौर जसपालसिंग रयत (वय ४५, रा. आस्था सोसायटी, टेकानाका, पाचपावली या आपल्या आईवडिलांना सोडण्यासाठी सदर पोलीस ठाण्याच्या हद्दीत लिबर्टी चौकात सिटी बसस्थानकावर आल्या होत्या. आई वडिलांना बसमध्ये बसवित असताना त्यांच्या आजुबाजुला असलेल्या पाच महिलांनी गुरप्रीतकौर यांच्या हँडबॅगची चेन उघडून त्यातील छोटी पर्स, कागदपत्र, लायसन्स व रोख १ हजार रुपये असा मुद्देमाल चोरी केला. चोरी झाल्याचे लक्षात येताच गुरप्रीतकौर यांनी आरडाओरड केली. यावेळी चौकात कर्तव्यावर हजर असलेल्या वाहतूक पोलिसांनी शोधाशोध केली असता चोरी केलेल्या महिला एका बसमध्ये चढताना दिसल्या. लगेच वाहतूक पोलीस त्यांच्या मागोमाग बसमध्ये चढले. त्यांनी बसचे दार बंद करून बस थेट सदर पोलीस ठाण्यात आणली. तेथे आरोपी महिलांना सदर पोलिसांच्या स्वाधीन करण्यात आले.

हेही वाचा – यवतमाळ : प्रकल्प अधिकाऱ्यांची बनावट स्वाक्षरी, शासनाची २० लाखांनी फसवणूक

हेही वाचा – नागपूर : आरटीओ संकेत गायकवाड आणि गीता शेजवळवर गुन्हे दाखल, गीता शेजवळनेच झाडली संकेतवर गोळी

पाचही महिला आरोपींविरुद्ध कलम ३७९, ३४ नुसार गुन्हा दाखल करण्यात आला. ही कारवाई सदर वाहतूक विभागाचे प्रभारी सहाय्यक पोलीस निरीक्षक प्रशांत अन्नछत्रे यांच्या मार्गदर्शनाखाली राजेंद्र झरबडे, विनायक इंगळे, इंदल भजन, मंदा धुर्वे, प्रविण पांडे यांनी केली.