बनावट नोटांचा ‘खेळ’ उघड; पोलिसांची धडक कारवाई, तिघे ताब्यात

या घटनेमुळे  शहरात खळबळ उडाली आहे. पोलीस निरीक्षक दिनेश दहातोंडे यांना रहाटगाव परिसरात काही युवक दैनंदिन व्यवहारात बनावट नोटा वापरत असल्याची माहिती मिळाली होती. या माहितीची खातरजमा होताच त्यांनी तातडीने पोलीस पथकासह उपलब्ध पंचांना घेऊन नांदगाव पेठ पोलीस ठाण्याच्या शासकीय वाहनाने घटनास्थळ गाठले.

रहाटगाव येथील वृंदावन कॉलनी परिसरात रस्त्याकडेला बसलेल्या काही संशयितांना गुप्त बातमीदारांनी दिलेल्या माहितीनुसार पोलिसांनी शिताफीने सापळा रचला. शासकीय वाहन काही अंतरावर उभे करून पोलिसांनी तिघा संशयितांना जागीच पकडले. आरोपी पळून जाण्याचा प्रयत्न करत असताना पोलिसांनी त्यांना ताब्यात घेतले. त्यांची नावे संचित अरविंद चव्हाण (वय १९, रा. रहाटगाव प्लॉट), दीपक बाबुलाल खंडारे (वय ३२, रा. पंचशील नगर, रहाटगाव) आणि संघरत्न राजेंद्र मोटघरे (वय ३६, रा. जुनी वस्ती, मस्जिदजवळ, रहाटगाव) अशी असल्याचे त्यांनी सांगितले.

२६,५०० रुपयांच्या बनावट नोटा जप्त

पंचांसमक्ष घेतलेल्या अंगझडतीत संचित चव्हाण याच्याकडे ५०० रुपयांच्या २६ नोटा (१३,००० रुपये), दीपक खंडारेकडे १५ नोटा (७,५०० रुपये) तर संघरत्न मोटघरेकडे १२ नोटा (६,००० रुपये) अशा एकूण २६,५०० रुपयांच्या बनावट नोटा मिळून आल्या. या सर्व नोटांचे बारकाईने निरीक्षण केले असता त्यावर रिझर्व बँकेचे चिन्ह आणि वॉटरमार्क  नसल्याचे आणि पाण्याने पुसल्यास रंग निघत असल्याचे स्पष्ट झाले. यामुळे नोटा बनावट असल्याचे निष्पन्न झाले.

मुख्य सूत्रधार फरार

या नोटा पंचांसमक्ष सीलबंद करून जप्त करण्यात आल्या. चौकशीदरम्यान संचित चव्हाण याने कबूल केले की, या बनावट नोटा आदित्य किशोर रामेकर (वय २५, रा. समर्थवाडी, रहाटगाव) याने बाजारात वापरण्यासाठी दिल्या होत्या. आदित्य रामेकर घटनेनंतर फरार झाला असून पोलीस त्याचा शोध घेत आहेत. पोलीस शिपाई निलेश जानराव साविकर यांच्या फिर्यादीनुसार या प्रकरणात चारही आरोपींविरुद्ध भारतीय न्याय संहिता २०२३ अंतर्गत कलम १७९ (बनावट नोटांचा व्यवहार) आणि १८० (बनावट नोटा तयार करणे किंवा बाळगणे) नुसार गुन्हा दाखल करण्यात आला आहे.