बुलढाणा : संतनगरी शेगावात दोन क्विंटल गांजा जप्त, एक आरोपी जेरबंद

शेगाव नगरीतील कचरा डेपो (डंपिंग ग्राउंड) परिसरात आज ही कारवाई करण्यात आली. यावेळी पोलिसांनी एका आरोपीस ताब्यात घेतले असून एक आरोपी पसार होण्यात यशस्वी झाला आहे. डोंगरसिंग जुलालसिंग झाडे (४७, रा. कुऱ्हा, ता. मोताळा, जि. बुलढाणा) असे जेरबंद करण्यात आलेल्या आरोपीचे नाव आहे. प्रकरणी शेगाव शहर पोलिसांनी एन.डी.पी.एस. कायद्याच्या कलम ८(सी), २० (ब) (ii) (सी), २२ (सी) नुसार गुन्हा दाखल करण्यात आला आहे. पोलीस निरीक्षक नितीन विनायक पाटील यांनी फिर्याद दिली आहे. पोलीस उपनिरीक्षक कुणाल जाधव यांच्यावर आव्हानात्मक घटनेच्या तपासाची जवाबदारी सोपविण्यात आली आहे.

या कारवाईत हिरवट, काळसर, कळीदार बिजा असलेला दोन क्विटंल सात किलो गांजा हिरो प्रो-कंपनीची मोटारसायकल, एक रियल मी कंपनीचा मोबाईल, असा एकूण ४२ लाख रुपयांचा मुद्देमाल जप्त करण्यात आला आहे.

कचरा डेपोजवळ आरोपी डोंगरसिंग झाडे आणि त्याचा साथीदार गुलजार शेख (रा. पिंपळखुटा, ता. पातुर, जि. अकोला) हे गांजासह आल्याची माहिती पोलिसांना मिळाली. यावेळी छापा घातला असता आरोपी डोंगरसिंग जुलालसिंग झाडे यास पकडण्यात आले. मात्र आरोपी गुलजार शेख हा अंधाराचा फायदा घेऊन फरार झाला. आरोपीच्या प्राथमिक चौकशीनंतर या ठिकाणावरून दोन क्विटंल गांजा, दुचाकी, मोबाईल जप्त करण्यात आला.