शेगावात एकाच वेळी दोन तलाठी एसीबीच्या जाळयात!

तक्रारदारच्या चुलतभावाची एक जेसीबी आणि एक टिप्पर तसेच इतर नातेवाईकाचे एक टिप्पर असे तीन वाहने गौण खनिजाची वाहतूक करतात .मागील १० सप्टेंबर रोजी ग्राम माटरगाव शिवाराचे तलाठी अरूण गुलाबसिंग डाबेराव ( राहणार सावता चौक, जुने महादेवाच्या मंदिराजवळ शेगाव) यांनी सदरचे खाली वाहने पकडली. तिन्ही वाहने अवैध मुरूम उत्खनन करण्याकरिता जात होती.त्यामुळे त्यांचेवर कारवाई करून सदर वाहने शेगाव तहसील कार्यालय येथे लावतो अशी धमकी तलाठी डाबेराव यांनी दिली. जर वाहने सोडून द्यायचे असतील तर त्याकरिता ५० हजार रूपये द्या, अशी लाचेची मागणी तक्रारदाराकडे केली. त्यावेळी तक्रारदार यांनी १९ हजार रूपये तलाठी डाबेराव यांना दिले उर्वरित ३१ हजार रूपये सकाळी आणून देतो असे सांगितले.

दरम्यान त्यांनी उपरोक्त गैरप्रकाराची तक्रार अकोला ॲन्टी करप्शन ब्युरो विभागाकडे केली . पथकाने १२ सप्टेंबर रोजी पंचासमक्ष लाच मागणी पडताळणी कार्यवाही केली. अरूण डाबेराव यांनी तडजोडीअंती २० हजार रूपये लाच रकमेची मागणी करून सदरची लाच रक्कम ही आरोपी अमोल गिते (राहणार अकोट रोड, शेगाव )यांची असल्याचे सांगितले. त्यावरून २२ सप्टेंबर रोजी पडताळणी कार्यवाही आजमाविली असता आरोपी तलाठी अमोल गिते यांनी मागणी करण्यात आलेल्या लाचेच्या रकमेस दुजोरा दिला. यानंतर तीस सप्टेंबर रोजी अकोला ॲन्टी करप्शन ब्युरोच्या अधिकाऱ्यांनी तलाठी अरूण डाबेराव व अमोल गिते यांना ताब्यात घेतले त्यांचे विरूध्द शेगाव शहर पोलीस ठाण्यात काल रात्री उशिरा भ्रष्टाचार प्रतिबंधक अधिनियम १९९८ च्या कलमान्वये गुन्हा दाखल करण्यात आला . सदरची कारवाई ॲन्टी करप्शन ब्युरो अकेालाचे पोलीस निरीक्षक प्रविण वेरूळकर, पोलीस डिगांबर जाधव, निलेश शेगोकार, असलम शहा, गोपाल किरडे, शालू हंबर्डे आणि सलीम खान यांनी केली. या कारवाईने महसूल विभागसह प्रशासकीय वर्तुळत खळबळ उडाली आहे. गलेलठ्ठ पगार असतानाही कर्मचारी वर कमाई साठी कोणत्या पातळीला जातात हे या घटनेने पुन्हा एकदा सिद्ध झाले आहे.