नागपूर : धरमपेठच्या पायरेट्स पबमध्ये सोमवारी मध्यरात्री तरुणींकडे बघून नृत्य करीत असताना धक्का लागल्याच्या क्षुल्लक कारणातून चार तरुणांनी गोंधळ घालत दोघांना बेदम मारहाण केली. डोक्यावर बिअरची बाटली फोडून जखमी केले. या प्रकरणी अंबाझरी पोलिसांनी गुन्हा नोंदवून आरोपींचा शोध सुरू केला आहे. हेही वाचा >>> गृहमंत्र्यांच्या सुरक्षेच्या दृष्टीने ‘प्रहार’च्‍या सभेला परवानगी नाकारली; अखेर जिल्हा परिषदेने… मिर्झा अस्लान फहीम बेग (२३) रा. महाल आणि ओम कथले अशी जखमींची नावे असून त्यांच्यावर उपचार सुरू आहेत. बॉबी उर्फ प्रशांत धोटे (३६) रा. ओमनगर, पीयूष उर्फ ऋषीकेश वाघमारे (२४) रा. रेशीमबाग, रॉकी जाधव (३५) व श्रेयांश शाहू (२२) दोन्ही रा. जुनी शुक्रवारी, अशी आरोपींची नावे आहेत. मिर्झा आणि ओम त्यांच्या दोन मित्रांसोबत पबमध्ये पार्टी करीत होते. त्यांच्या शेजारीच बॉबी, पीयूष, रॉकी व श्रेयांश हे चौघेही पार्टी करीत होते. या दरम्यान रॉकीचा अस्लानला धक्का लागला. याचा जाब विचारला असता रॉकी संतापला व त्याने अस्लानला शिवीगाळ सुरू केली. त्याच वेळी रॉकीने बिअरची बाटली अस्लानच्या डोक्यावर मारली. ओम अस्लानच्या मदतीला आला असता आरोपींनी त्यालाही मारहाण केली.
