शिक्षक मतदारसंघासाठी मतदार नोंदणी, ३० डिसेंबरला अंतिम यादी

या मतदार नोंदणीसाठी अमरावती आयुक्त हे मतदार नोंदणी अधिकारी असून, जिल्हाधिकारी हे सहायक मतदार नोंदणी अधिकारी म्हणून कार्य करतील. तसेच जिल्ह्यातील सहा उपविभागीय अधिकारी हे सहायक मतदार नोंदणी अधिकारी व तहसीलदार हे पदनिर्देशित अधिकारी असतील. घोषित कार्यक्रमानुसार १५ऑक्टोबर रोजी प्रथम पुनःप्रसिद्धी, २५ ऑक्टोबर रोजी द्वितीय पुनःप्रसिद्धी, दावे व हरकती सादर करण्याची अंतिम तारीख ६ नोव्हेंबर राहील. २५ नोव्हेंबर रोजी प्रारूप मतदार याद्या प्रसिद्ध केली जाईल. त्यानंतर २५ नोव्हेंबर ते १० डिसेंबरपर्यंत दावे व हरकती स्वीकारण्यात येतील. २५ डिसेंबरपर्यंत दावे व हरकती निकाली काढून पुरवणी यादी तयार करण्यात येईल. ३०डिसेंबर रोजी मतदार यादी अंतिम होणार आहे.

नोंदणीचे निकष

राज्य शासनाने निवडणूक आयोगाच्या मान्यतेने निश्चित केलेल्या माध्यमिक शाळेपेक्षा कमी दर्जा नसलेल्या शैक्षणिक संस्थांमध्ये मागील ६ वर्षामध्ये किमान ३ वर्षे पूर्णवेळ शिक्षक म्हणून कार्यरत असलेले शिक्षक नोंदणीस पात्र आहे. त्यांना मतदार नोंदणीसाठी सुधारित नमूना क्रमांक १९ मध्ये आवश्यक कागदपत्रांसह व प्रमाणपत्रांसह अर्ज सादर करता येणार आहे. ज्या शिक्षकांची नावे अमरावती विभाग शिक्षक मतदारसंघाच्या विद्यमान मतदार यादीमध्ये समाविष्ट आहेत, त्यांनीही नव्याने नमूना १९ अर्ज आवश्यक कागदपत्रांसह व प्रमाणपत्रासह सादर करणे आवश्यक राहणार आहे.

बुलढाणा जिल्ह्यातील पात्र शिक्षकांना शैक्षणिक संस्थेच्या प्रमुखाने दिलेले प्रमाणपत्रासह अर्ज सादर करणे आवश्यक आहे. हा नमुना १९ व विहित प्रमाणपत्राचा नमुना जिल्हाधिकारी, उपविभागीय अधिकारी, तहसिलदार यांच्या कार्यालयात उपलब्ध आहे. अर्ज संबंधित तहसिल कार्यालयात भरुन देता येणार आहे.

एकगठ्ठा पद्धतीला चाप

यापूर्वी राजकीय पक्ष पात्र मतदारांच्या अर्जाचे गठठे नोंदणी साठी सादर करत होते. मात्र यंदा राजकीय पक्षांना एकगठ्ठा अर्ज करता येणार नाही.नमूना क्रमांक-19 मधील एकगठ्ठा अर्ज, मग ते व्यक्तिशः दाखल केलेले असोत अथवा पोस्टाने पाठविलेले असोत, मतदार नोंदणीसाठी विचारात घेतले जाणार नाहीत. मात्र पात्र शैक्षणिक संस्थेचे प्रमुख हे त्यांच्या संस्थेतील पात्र कर्मचाऱ्यांचे अर्ज एकत्रित पाठवू शकतील. राजकीय पक्ष, मतदान केंद्रस्तरीय प्रतिनिधी, रेसीडेन्ट वेलफेअर असोसिएशन यांनाही एकगठ्ठा अर्ज करता येणार नाहीत, असे आयोगाने स्पष्ट केले आहे. पात्र शिक्षकांनी ६ नोव्हेंबर,पर्यंत विहित नमूना-१९ मधील अर्ज आवश्यक प्रमाणपत्रांसह दाखल करावे असे आवाहन करण्यात आले आहे.