आघाडीत बिघाडी ! काँग्रेस प्रभारी राजेंद्र मुळक आशावादी तर अनिल देशमुख म्हणतात समीर तर…

जिल्ह्यात काँग्रेसतर्फे माजी आमदार रणजित कांबळे व शहर नेते शेखर शेंडे यांना जबाबदारी दिल्याचे प्रभारी असलेले राजेंद्र मुळक यांनी स्पष्ट केले होते. तर राष्ट्रवादीतर्फे जिल्हाध्यक्ष अतुल वांदिले व खासदार अमर काळे हे बोलणी करतील असे ठरले. काँग्रेस या दोघांशिवाय अन्य राष्ट्रवादी नेत्यास मोजायला पण तयार नसल्याचे दिसून येत होते. हू इज समीर ? असा प्रश्न काँग्रेस नेत्याने केला आणि आघाडीत कोलीत पडले. वांदिले हेच काय ते ठरवतील, समीरसोबत बोलणार नाही, अशी भाषा असतांनाच पक्षाच्या ज्येष्ठ नेत्यांनी मात्र सहकार गटास कौल दिला होता.

वर्धा व देवळी मतदारसंघात सहकार गट निर्णय घेणार हे प्रदेश नेत्यांनी सांगितल्याचे समीर देशमुख बोलतात. त्याची प्रचिती त्यांनी काँग्रेस नेत्यांना दिली. वर्धा पालिकेतील सर्व चाळीस जागा व नगराध्यक्ष पदाचे एबी फॉर्म सहकार गटाने अधिकार दिलेले समीर देशमुख यांना मिळाले होते. हे वास्तव नाकारणाऱ्या रणजित कांबळे यांना शेवटी धडा मिळाला. त्यांनी केलेले जागावाटप नाकारून समीर यांनी सर्व अर्ज दाखल करीत काँग्रेसवर मात केली.

आता काँग्रेस नेते घायकुतीस आले आहे. शेखर शेंडे म्हणाले,  समीर यांचे जागावाटप योग्यच. ते आता खरे ठरणार कां, अशी उत्सुकता. कारण ज्येष्ठ नेते अनिल देशमुख यांनी जिल्हा नेते प्रा. सुरेश देशमुख यांच्याशी स्वतः संवाद साधला. तर काँग्रेस प्रभारी राजेंद्र मुळक हे समीर देशमुख यांच्याशी बोलले. समीर देशमुख म्हणतात की मुळक  यांचा मला फोन आला. भेटण्याची इच्छा दाखविली. तेव्हा मीच त्यांचा आदर म्हणून नागपुरात उदया भेटीस येण्याचे कळविले आहे.

अर्ज परत घेण्याच्या मुदतीआंत  काही तडजोड करण्याची त्यांची भूमिका असावी. त्याचे मी स्वागत करतो. तर ज्येष्ठ नेते अनिल देशमुख या संदर्भात लोकसत्ताशी बोलतांना म्हणाले की निर्णय पक्ष घेईल. मिळून ठरेल. समीर देशमुख यांना अधिकार आहेत कां, या प्रश्नावर त्यांनी थेट बोलणे टाळले. मात्र म्हणाले की जिल्हाध्यक्ष अतुल वांदिले, ज्येष्ठ नेते सुरेश देशमुख व युवा नेते समीर देशमुख हे मिळून पक्षाचा निर्णय घेणार.