जळगाव : आदिवासींचे अनेक प्रश्न वर्षानुवर्षांपासून प्रलंबित असताना त्यांची तत्काळ सोडवणूक करण्यासाठी संबंधित खात्याचे मंत्री तसेच अधिकाऱ्यांच्या बैठकीचे आयोजन मंत्रालयात करण्यात येईल. आदिवासींच्या विकासासाठी निधीची कमतरता भासल्यास विधिमंडळाच्या आगामी अधिवेशनात त्याकरीता विशेष तरतूद करण्यात येईल, अशी घोषणा उपमुख्यमंत्री अजित पवार यांनी येथे केली.
जळगावमधील शिवतीर्थ मैदानावर समृद्ध खान्देश संकल्प आणि पक्ष प्रवेश मेळाव्याचे आयोजन रविवारी करण्यात आले. त्यात खान्देशात वास्तव्यास असलेल्या आदिवासी समुदायाच्या प्रश्नांवर बोलताना उपमुख्यमंत्री पवार यांनी त्यांच्या प्रलंबित प्रश्नांची सोडवणूक करण्यासाठी आपण यापुढे कटिबद्ध असल्याची ग्वाही दिली. सत्ता केवळ मिरवण्यासाठी नसते तर आदिवासींसह दलित, वंचित आणि बहुजनांचे प्रश्न सोडविण्यासाठी असते, असेही ते म्हणाले. व्यासपीठावर राष्ट्रवादी काँग्रेसचे (अजित पवार) ज्येष्ठ नेते तथा मंत्री छगन भुजबळ, नरहरी झिरवळ, माणिकराव कोकाटे, आमदार अनिल पाटील, माजी मंत्री गुलाबराव देवकर, डॉ. सतीश पाटील, माजी आमदार कैलास पाटील, मनीष जैन, अजित पवार गटाचे जळगाव लोकसभा क्षेत्राचे जिल्हाध्यक्ष संजय पवार, रावेर लोकसभा क्षेत्राचे जिल्हाध्यक्ष उमेश नेमाडे, जळगाव शहर अध्यक्ष अभिषेक पाटील, महिला आघाडी जिल्हाध्यक्ष कल्पना पाटील आदी उपस्थित होते.
दरम्यान, काँग्रेसच्या प्रदेश उपाध्यक्षा तथा लोकसंघर्ष मोर्चाच्या राष्ट्रीय अध्यक्षा प्रतिभा शिंदे यांनी लोकसंघर्ष मोर्चाच्या हजारो कार्यकर्त्यांसह तसेच भगतसिंग पाटील व इतर पदाधिकाऱ्यांनी अजित पवार गटात प्रवेश केला. त्यानंतर शिंदे यांनी राहुल गांधी चांगला माणूस असल्याचे सांगून राज्यातील काँग्रेसची मंडळी कोणाला काम करू देत नसल्याची नाराजी जाहीरपणे व्यक्त केली. तसेच आदिवासींचे प्रश्न सोडविण्यासाठी आपण अजित पवार गटात प्रवेश करत असल्याचे स्पष्ट केले. खान्देशच्या विकासाचा अनुशेष भरून काढण्यासाठी स्वतंत्र वैधानिक विकास महामंडळ स्थापन करण्याची मागणी त्यांनी केली. खान्देशातील तरूण-तरूणींना स्थानिक पातळीवर रोजगाराची संधी उपलब्ध व्हावी म्हणून औद्योगिक विकासाला गती देण्यासह दीपनगर वीज केंद्रातील राखेवर स्थानिकांना २० टक्के अधिकार द्यावा, आदिवासींना कसेल त्याची जमीन आणि राहील त्याचे घर, या न्यायाने हक्क मिळावा. यावल व्यतिरिक्त एरंडोल येथे आणखी दुसरे एकात्मिक आदिवासी विकास प्रकल्प कार्यालय सुरू करावे, अशा काही मागण्या प्रतिभा शिंदे यांनी उपमुख्यमंत्री पवार यांच्याकडे केल्या.
प्रतिभा शिंदे यांनी केलेल्या मागण्यांच्या अनुषंगाने मंत्रालयात ऑगस्ट महिनाअखेर किंवा सप्टेंबरच्या पहिल्या आठवड्यात बैठकीचे आयोजन करण्याचे सूतोवाच उपमुख्यमंत्री पवार यांनी केले. आदिवासी किंवा इतर घटकांचे प्रश्न सोडविण्यासाठी तातडीने कार्यवाही करण्याचे निर्देशही त्यांनी मंत्री झिरवळ यांच्यासह कोकाटे यांना व्यासपीठावरून दिले. मंत्री छगन भुजबळ यांनी केंद्र सरकारच्या जात गणनेचे समर्थन करतानाच ओबीसींसह दलितांसाठी सध्या जसे आरक्षण आहे तसे ते कायम ठेवण्याची गरज व्यक्त केली. मंत्री झिरवळ यांनीही गायरानावर राहणाऱ्या आदिवासींना शासकीय योजनांचा लाभ मिळावा म्हणून प्रयत्नशील असल्याची ग्वाही दिली. आमदार अनिल पाटील यांनी प्रास्ताविक केले. संजय पवार यांनी आभार मानले.
