नाशिक – सध्या साहिल पारख हे नाव चर्चेत आहे. केवळ नाशिकच नव्हे तर, त्याच्या कामगिरीने ऑस्ट्रेलियाही चकित झाले आहे. वैभव सूर्यवंशीप्रमाणेच संपूर्ण क्रिकेट क्षेत्रात साहिल पारख कुठला, त्याची कामगिरी काय, असा प्रश्न विचारला जात आहे.
आंतरराष्ट्रीय क्रिकेटमधील पदार्पणाच्या मालिकेत झंझावाती शतक झळकावलेल्या नाशिक जिल्हा क्रिकेट संघटनेचा युवा खेळाडू , आक्रमक डावखुरा सलामीवीर म्हणून साहिल पारख ओळख निर्माण करत आहे. १९ वर्षांखालील वयोगटातील महाराष्ट्र संघाच्या चेन्नई दौऱ्यासाठी कर्णधारपदी त्याची निवड झाली आहे. त्यासह नाशिकचा अष्टपैलू डावखुरा समकित सुराणा याचा देखील संघात समावेश करण्यात आला आहे. बीसीसीआयच्या नविन सुरु होणाऱ्या २०२५-२६ क्रिकेट हंगामासाठी महाराष्ट्र क्रिकेट संघटनेची तयारी सुरु आहे. या अनुषंगाने महाराष्ट्राच्या १९ वर्षांखालील संघाच्या सराव सामन्यांसाठी महाराष्ट्र संघ चेन्नई येथे जाणार आहे. या सराव क्रिकेट दौऱ्यासाठी महाराष्ट्र संघाच्या कर्णधारपदी साहिल पारखची निवड करणात आली आहे. १८ खेळाडूंचा १९ वर्षांखालील महाराष्ट्र संघ चेन्नई येथे चार दिवसीय सामने खेळणार आहे.
नाशिकचा खेळाडू भारतीय संघात असावा, हे सर्व नाशिककरांचे स्वप्न साहिल पारख साकार करत सप्टेंबर २०२४ मध्ये ऑस्ट्रेलियाविरुद्धच्या एकदिवसीय मालिकेत चमकला. आक्रमक डावखुरा सलामीवीर साहिल पारखने १९ वर्षांखालील भारतीय संघाचे प्रतिनिधित्व करतांना आपल्या लौकिकास साजेशी फलंदाजी करत, केवळ ७५ चेंडूत नाबाद १०९ धावा फटकावत, भारतीय संघाला केवळ २२ षटकांतच ९ गडी राखून शानदार विजय मिळवून दिला होता. त्यामुळे त्याच्या नावाची ऑस्ट्रेलियातही चर्चा झाली.
त्यानंतर २०२४-२५ च्या हंगामात साहिल पारखची बीसीसीआयच्या विनू मंकड स्पर्धेठी १९ वर्षांखालील वयोगटातील महाराष्ट्र संघाच्या उपकर्णधारपदी निवड झाली होती .साहिल पारख ६ ते १६ मे या कालावधीत झालेल्या भारतीय क्रिकेट नियामक मंडळातर्फे (बीसीसीआय) आयोजित नॅशनल क्रिकेट अकादमीच्या (एनसीए) बंगळूरु येथे झालेल्या इंटर सेंटर ऑफ एक्सलन्स स्पर्धेत निवडला गेला होता. भारतभरातील उदयोन्मुख युवा खेळाडूंसाठी बीसीसीआयच्या एनसीए बंगळूरूतर्फे आयोजित राष्ट्रीय पातळीवरील शिबीरात साहिलची सलग तीन ते चार वर्षांपासून निवड होत आहे.
वेळोवेळी झालेल्या राष्ट्रीय व राज्यस्तरीय स्पर्धेत केलेल्या लक्षणीय कामगिरीच्या जोरावरच १९ वर्षांखालील महाराष्ट्राच्या संघाच्या कर्णधारपदी साहिलची निवड झाली आहे. नाशिकचा डावखुरा समकित सुराणा हा उदयोन्मुख अष्टपैलू खेळाडू असून नुकत्याच संपलेल्या हंगामात १९ वर्षांखालील नाशिक जिल्हा क्रिकेट संघाचे कर्णधारपद भूषवताना राज्यस्तरीय आमंत्रितांच्या क्रिकेट ( एमसीए इन्विटेशन लीग ) स्पर्धेत फलंदाजी व डावखुरी फिरकी गोलंदाजीत जोरदार कामगिरी केली होती. वेळोवेळी झालेल्या राष्ट्रीय व राज्यस्तरीय स्पर्धेत केलेल्या लक्षणीय कामगिरीच्या जोरावरच या दोन नाशिककर खेळाडूंची १९ वर्षांखालील महाराष्ट्राच्या संघाच्या चेन्नई दौऱ्यासाठी निवड झाली आहे.
