जळगाव: स्थानिक स्वराज्य संस्थांच्या निवडणुकांचा रणसंग्राम जवळ येत असताना, जळगाव महापालिका आपल्या ताब्यात घेण्यासाठी भाजपने आता शिवसेनेला (उद्धव ठाकरे गट) मोठा धक्का देण्याची तयारी केली आहे. ठाकरे गटाचे बरेच मोहरे भाजपच्या गळाला देखील लागले आहेत.
जळगाव महापालिकेच्या २०१८ मधील निवडणुकीत भाजप आणि शिवसेना या दोन्ही पक्षांनी स्वतंत्रपणे मैदानात उतरून एकमेकांच्या विरोधात जोरदार लढत दिली होती. त्या वेळी भाजपने सर्वाधिक जागा जिंकत महापालिकेवर आपले वर्चस्व प्रस्थापित केले असले, तरी नंतरच्या काळात शिवसेनेने भाजपचे काही नगरसेवक आपल्या बाजूला ओढून सत्तेचा पलडा आपल्या दिशेने झुकवत महापालिकेची सत्ता मिळवली होती. ज्यामुळे भाजप नेते मंत्री गिरीश महाजन आणि आमदार सुरेश भोळे यांना मोठा धक्का बसला होता.
या संपूर्ण घडामोडीत ठाकरे गटाचे तत्कालीन विरोधी पक्ष नेते सुनील महाजन यांची भूमिका निर्णायक ठरली होती. भाजपचे नगरसेवक सोबत आल्यानंतर त्यांच्या सौभाग्यवती जयश्री महाजन यांची जळगावच्या महापौरपदी निवड झाली. पुढे विधानसभेच्या निवडणुकीतही महाजन परिवाराने भाजपसाठी मोठे आव्हान निर्माण केले. ठाकरे गटाकडून उमेदवारी मिळाल्यानंतर जयश्री महाजन आणि भाजप आमदार भोळे यांच्यात थेट आणि चुरशीची लढत पाहायला मिळाली.
आता भाजपने जळगाव महापालिकेवरील सत्ता परत मिळवण्यासाठी मोठी मोहीम सुरू केली आहे. ठाकरे गटाने भाजपचे काही नगरसेवक फोडून महापालिकेची सत्ता काबीज केली होती, त्याचाच हिशेब चुकता करण्याचा निर्धार भाजपने आता केला आहे. या पार्श्वभूमीवर, भाजपने सध्या ठाकरे गटात असलेल्या आणि माजी मंत्री सुरेश जैन यांचे समर्थक मानल्या जाणाऱ्या बऱ्याच नगरसेवकांना आपल्या गोटात आणण्यासाठी पाऊले उचलली आहेत. या यादीत एकेकाळी भाजपसाठी डोकेदुखी बनलेले सुनील महाजन, जयश्री महाजन तसेच माजी महापौर नितीन लढ्ढा यांच्यासह काही महत्त्वाचे पदाधिकारी समाविष्ट असल्याची माहिती समोर आली आहे. संबंधित सर्व नगरसेवकांना आपल्या बाजूला करण्यासाठी भाजपला ज्येष्ठ नेते सुरेश जैन यांची मनधरणी करावी लागली. भाजपचे ते प्रयत्न यशस्वी ठरल्याने ठाकरे गटासाठी तो निश्चितच मोठा राजकीय धक्का ठरणार आहे.
भाजपमध्ये यांचा प्रवेश ?
पक्ष विभाजनानंतर ठाकरे गटाचे अनेक दिग्गज पदाधिकारी आधीच शिंदे गटात गेले आहेत. त्यात माजी महापौर लढ्ढा यांच्यासह सुनील महाजन, जयश्री महाजन, प्रशांत नाईक, आबा कापसे, प्रतिभा कापसे, इकबाल पिरजादे, पिंटू सपकाळे, हर्षा अमोल सांगोरे, जाकीर पठाण, फिरोज पठाण आदींसह इतर काही पदाधिकारी भाजपमध्ये प्रवेश करणार असल्याची माहिती समोर आली आहे. संबंधित सर्व पदाधिकारी मंत्री महाजन यांच्या उपस्थितीत शुक्रवारी भाजपमध्ये प्रवेश करणार असल्याचे सांगितले जात आहे. त्यास भाजपचे महानगर जिल्हाप्रमुख दीपक सूर्यवंशी यांनीही दुजोरा दिला आहे.
