जळगाव : भडगावात चहाच्या हॉटेलमध्ये फ्रीजचा स्फोट; १३ जण जखमी

जिल्ह्यातील भडगाव येथे पारोळा चौफुलीवरील एका चहाच्या हॉटेलमध्ये अचानक फ्रिजच्या कॉम्प्रेसरचा स्फोट होऊन हॉटेल मालकासह १३ जण जखमी झाले.

Written by लोकसत्ता टीम

जळगाव

September 15, 2025 07:27 IST

jalgaon bhadgaon tea hotel fridge compressor blast 13 injured

भडगावात चहाच्या हॉटेलमध्ये फ्रीजचा स्फोट (छायाचित्र:लोकसत्ता टीम)

जळगाव : जिल्ह्यातील भडगाव येथे पारोळा चौफुलीवरील एका चहाच्या हॉटेलमध्ये अचानक फ्रिजच्या कॉम्प्रेसरचा स्फोट होऊन हॉटेल मालकासह १३ जण जखमी झाले. जखमींपैकी काहींची प्रकृती गंभीर असून त्यांच्यावर पाचोरा, जळगाव आणि धुळे येथील रूग्णालयात उपचार सुरू आहेत.

चहा पिण्यासाठी ग्राहकांची रविवारी दुपारनंतर गर्दी झाली होती. त्याचवेळी अचानक मोठा स्फोट झाला. प्राथमिक अंदाजानुसार, हॉटेलमधील फ्रिजच्या कॉम्प्रेजरचा स्फोट झाल्यामुळे हा स्फोट झाला. जखमींना तातडीने भडगाव ग्रामीण रुग्णालयात दाखल करण्यात आल्यानंतर वैद्यकीय अधिकाऱ्यांनी त्यांच्यावर प्राथमिक उपचार केले. मात्र, काहींची प्रकृती जास्त चिंताजनक असल्याने त्यांना पुढील उपचारासाठी पाचोरा, जळगाव तसेच धुळे येथील खासगी आणि शासकीय रुग्णालयात हलविण्यात आले. रुग्णवाहिका चालक निळू पाटील, भैया पाटील, सागर पाटील व गोलू शिंदे यांनी पुढाकार घेत जखमींना वेळीच रुग्णालयात पोहोचवले. त्यांच्या तत्परतेमुळे अनेकांचे प्राण वाचल्याचे नातेवाईकांनी सांगितले. दरम्यान, आमदार किशोर पाटील यांनी तातडीने ग्रामीण रूग्णालय गाठून जखमींना दिल्या जाणाऱ्या उपचाराची माहिती घेतली. त्याचप्रमाणे जखमींच्या नातेवाइकांची भेट घेऊन प्रशासनाकडून सर्वतोपरी मदत मिळेल, असे आश्वासन दिले. याशिवाय, गंभीर जखमींना आवश्यक ते उपाचार व शासकीय योजना तातडीने लागू करण्याचे निर्देश आमदार पाटील यांनी आरोग्य यंत्रणेला दिले.

भडगाव बसस्थानक परिसरात दिवसभर मोठी वर्दळ असलेल्या पारोळा चौफुलीवर झालेल्या या स्फोटामुळे परिसरातील नागरिकांमध्ये भीतीचे वातावरण पसरले आहे. पोलिसांनी घटनास्थळी धाव घेऊन स्फोटाचे कारण शोधण्यास लगेच सुरूवात केली. हॉटेल चहाच्या पिण्यासाठी बरेच जण थांबलेले असतानाच फ्रिजच्या कॉम्प्रेसरचा अचानक स्फोट झाल्याने आगीचा भडका उडाला. त्यात हॉटेल मालकासह त्यांचा मुलगा व इतर ग्राहक होरपळले. स्फोट झाल्याचा मोठा आवाज ऐकून आजुबाजुच्या घरांमधील नागरिक भीतीपोटी घराबाहेर पळाले होते.

हेही वाचा

महाराष्ट्रातील सामाजिक वीण उसविणे धोकादायक – शरद पवार यांचा इशारा

जखमींमध्ये यांचा समावेश

जखमींमध्ये हॉटेल मालक शेख रफिक शेख रज्जाक (५०), त्यांचा मुलगा सोहिल शेख रफिक मणियार (२८, दोघे रा. ग्रीन पार्क कॉलनी, भडगाव), ग. स. सोसायटीचे माजी उपाध्यक्ष रवींद्र मुकुंदराव सोनवणे (५६, रा. बाळद रोड, भडगाव), इकबाल शेख गनी (४०, रा. गंजी वाडा, भडगाव), एजाजोद्दीन रियाजद्दीन मुल्ला (३२, रा. जलाली मोहल्ला, भडगाव), मोहसीन शेख शब्बीर (३३, रा. ग्रीन पार्क कॉलनी), दिलीप भटा ठाकरे (६०, रा. साईनगर, भडगाव), भूषण प्रकाश पाटील (३४, रा. जुवार्डी, ता. भडगाव), राजकुमार मोतीराम पवार (२८, रा. बिदर, कर्नाटक), मयूर पदमसिंग पाटील (२८, वडधे, ता. भडगाव), राहुल बापू पाटील (४०, रा. जामदे, ता. चाळीसगाव), अमोल गोविंद शिंदे (३४, रा. वळूज, जि. सातारा) आणि गजानन दिगंबर उजेड (२८, रा. वडगाव, ता. जालना) यांचा समावेश आहे.