जळगाव – शेतकऱ्यांच्या घामातून उभी राहिलेली जिल्हा सहकारी बँकेची नवी पेठेतील ऐतिहासिक शाखा ‘दगडी बँक’ म्हणून ओळखली जाते, ती आता वादाच्या भोवऱ्यात सापडली आहे. शतकोत्तर परंपरा लाभलेली ही वास्तू विकण्याचा घाट विद्यमान संचालक मंडळाने घातल्याने बँकेचे ज्येष्ठ संचालक आमदार एकनाथ खडसे यांनीही त्यास तीव्र विरोध केला आहे.
परंपरेचे, वारशाचे आणि शेतकऱ्यांच्या कष्टाचे मोल पुरातन इमारतीच्या विक्रीतून कधीच होऊ शकत नाही. शेतकऱ्यांच्या भावना जुळलेल्या दगडी बँकेची ऐतिहासिक वास्तू विकण्यामागे संचालक मंडळाचा नक्की उद्देश काय आहे ? असा प्रश्न देखील आमदार खडसे यांनी उपस्थित केला आहे. जिल्हा सहकारी बँक ही फक्त आर्थिक संस्था नसून ग्रामीण भागातील शेतकऱ्यांचा विश्वास आणि अभिमान आहे. बँकेने पुरातन ठेवा मानल्या जाणाऱ्या अशा वास्तूंचा पुनर्विकास करावा. विक्रीच्या नावाखाली इतिहासच पुसून टाकण्याचा प्रयत्न करू नये, अशीही टीका खडसे यांनी केली आहे. दगडी बँकेची इमारत विकण्याच्या संचालक मंडळाच्या निर्णयाला आपला विरोध असल्याचेही त्यांनी जिल्हा सहकारी बँकेचे अध्यक्ष संजय पवार यांना दिलेल्या निवेदनात म्हटले आहे.
जिल्हा बँकेच्या संचालक मंडळाची बैठक बुधवारी आयोजित केली असून, त्यात दगडी बँक विक्रीचा विषय ठेवण्यात आला आहे. सरकारी नोंदणीकृत मूल्य निर्माता यांच्याकडून आलेल्या दगडी बँक इमारतीच्या मूल्य अहवालाची माहिती घेऊन पुढील कार्यवाही करण्याच्या बाबतीत विचार विनिमय सदर बैठकीत करण्यात येणार आहे. जिल्हा बँकेची सध्याची आर्थिक स्थिती पाहता कुठल्याही प्रकारे स्वत:च्या मालमत्ता विकण्याची गरज नाही. त्यानंतरही दगडी बँकेच्या पुरातन इमारतीची विक्री करण्याचा प्रयत्न केला जात असेल तर त्यास आपला विरोध असल्याचे खडसे यांनी म्हटले आहे.
शहरातील मध्यवर्ती भागात असलेली जिल्हा बँकेच्या मालकीची ब्रिटीशकालीन इमारत इतकी वर्षे दिमाखात उभी होती. काळाच्या ओघात काही प्रमाणात पडझड झालेल्या या इमारतीच्या दुरूस्तीकडे इतकी वर्षे जिल्हा बँकेने सोयीस्कर दुर्लक्ष केले. सुमारे ६५०० चौरस फूट चटई क्षेत्र असलेली दगडी बँक चार मजल्यांची आहे. १९१६ मध्ये जिल्हा सहकारी बँकेच्या तत्कालीन संचालक मंडळाने ही इमारत बँकेची नवीपेठ शाखा चालविण्यासाठी म्हणून भाड्याने घेतली होती. नंतरच्या कालखंडात १९२७ मध्ये संपूर्ण इमारत फक्त सात हजार रूपयांत खरेदी केली गेली. इमारतीचे बांधकाम दगडात झाले असल्याने तिला दगडी बँक म्हणून ओळख मिळाली.
दगडी बँकेची विक्री किंमत २७ कोटी
जळगाव जिल्हा बँकेने दगडी बँक म्हणून ओळखली जाणारी इमारत विकण्यासाठी ६५०० चौरस फूट चटई क्षेत्रासाठी सुमारे ४० हजार रुपये प्रति चौरस फूट दर निश्‍चित केला आहे. त्यानुसार संपूर्ण इमारतीचे एकूण मूल्य १२ कोटी आणि त्यावर अतिरिक्त १५ कोटी रूपये घेण्याचे संचालक मंडळाने ठरविले आहे. त्या अनुषंगाने अटी-शर्ती टाकून जिल्हा बँकेने यापूर्वी जाहिरात प्रसिद्ध केल्याचे समजते.
