नाशिक : खेळाडूंच्या हिताचा विचार करून राज्याचे सर्वसमावेशक क्रीडा धोरण तयार करण्यात येईल. खेळाडूंना आवश्यक सुविधा वेळेत उपलब्ध होतील, अशी ग्वाही क्रीडा मंत्री ॲड. माणिकराव कोकाटे यांनी येथे दिली.
शालेय शिक्षण व क्रीडा विभागातर्फे सोमवारी येथील गुरूदक्षिणा सभागृहात विकसित महाराष्ट्र २०४७ युवा व क्रीडा संवाद (नाशिक विभाग) हा कार्यक्रम आयोजित करण्यात आला होता. या कार्यक्रमात मंत्री कोकाटे यांनी मार्गदर्शन केले. २०४७ पर्यंतचे क्रीडा धोरण तयार करताना सूचना, अभिप्राय विचारात घेतले जातील. त्यासाठी जिल्हा क्रीडाधिकारी कार्यालयांमध्ये सूचना पेटी बसविण्यात येईल. जिल्हा क्रीडा संकुलांच्या देखभालीसाठी निधी उपलब्ध करून देण्यात येईल.
नंदुरबार येथे सिथेंटिक ट्रॅक उपलब्धतेसाठी आठ दिवसांत कार्यवाही करण्यात येईल. क्रीडा विकासासाठी हरियाणा, ओडिशा राज्यांकडून होत असलेल्या प्रयत्नांची माहिती घेऊन त्याची अंमलबजावणी करण्यात येईल. खेळाडू, प्रशिक्षकांना देण्यात येणारे पुरस्कार वितरणासाठी कालबद्ध कार्यक्रम निश्चित करण्यात येईल. मैदानांच्या विकासासाठी सहकार्य करण्यात येईल. आवश्यक साधनसामग्री, साहित्य उपलब्ध करून देण्यात येईल. क्रीडांगण विकासासाठीचा निधी वाढविण्यासाठी प्रयत्नशील असल्याचे कोकाटे यांनी सांगितले.
क्रीडा आयुक्त शीतल उगले- तेली यांनी, क्रीडा धोरणात सुधारणा करण्यात येत असून त्यासाठी सूचना आणि अभिप्राय मागविण्यात येत आहेत, असे नमूद केले. राज्य क्रीडा विकास निधीची स्थापना करण्यात आली आहे. मिशन लक्षवेध अंतर्गत १२ खेळांची निवड करण्यात आली आहे. त्यांच्यासाठी अत्याधुनिक सुविधा, साधने उपलब्ध करून देण्यात येत आहेत. आगामी काळात क्रीडा विभागाच्या कामकाजात एआय तंत्रज्ञानाचा वापर करण्यात येईल, असे त्यांनी सांगितले.
यावेळी आंतरराष्ट्रीय धावपटू कविता राऊत, नौकानयनपटू ऋषिकेश शिंदे, पूजा तांबे, कौसल्या पवार, शैलजा जैन, बळवंत निकुंभ, खुशाल शर्मा, मयूर ठाकरे, प्रणव गावित, कविता पाटील (नंदुरबार), ॲड. गोरख बलकवडे, मंदार देशमुख आदींनी सूचना केल्या. यावेळी आंतरराष्ट्रीय नौकानयनपटू दत्तू भोकनळ, क्रीडा उपसंचालक संजय सबनीस, स्नेहल साळुंखे, जिल्हा क्रीडा अधिकारी सुनंदा पाटील (नाशिक), रवींद्र नाईक (जळगाव), मनोहर पाटील (धुळे) आदी उपस्थित होते.
खेळांडुच्या सूचना
क्रीडा सुविधा मिळाव्यात, आंतरराष्ट्रीय दर्जाचे मैदान व्हावे, सरावासाठी सुविधा, नंदुरबारला स्वतंत्र क्रीडा प्रबोधिनी, क्रीडा संकुलास कायमस्वरूपी निधी, शाळांमध्ये क्रीडा शिक्षक भरती, प्रशिक्षक नियुक्त करावेत, छत्रपती पुरस्कार विजेत्यांना टोल माफी मिळावी, एक जिल्हा एक संघटना करावी, क्रीडा अनुदान सुरू करावे, डोपिंग चाचणीची व्यवस्था निर्माण करावी, क्रीडा स्पर्धा आयोजनाचा खर्च वेळेत मिळावा, २५० विद्यार्थ्यांमागे एक क्रीडा शिक्षक नियुक्त करावा, क्रीडा संघटना सक्षम कराव्यात, शालेय मैदानांना सुविधा मिळाव्यात, खेळाडूंना प्रवासात सवलत द्यावी, गाव तेथे क्रीडांगण असावे, विद्यापीठांचे क्रीडा धोरण असावे, प्रतिभावान खेळाडूंना वेळीच मदत करावी, खेळाडूंसाठी स्वतंत्र वैद्यकीय सुविधा उपलब्ध करून द्याव्यात, आदी सूचना खेळाडूंनी केल्या.
