महावितरण नाट्यस्पर्धेत पुण्याचे ‘डॉक्टर, तुम्ही सुद्धा!’ सर्वोत्कृष्ट – नागपूरचे ‘रंगबावरी’ द्वितीय

येथील महाकवी कालिदास कला मंदिरात महावितरणच्या राज्यस्तरीय आंतरप्रादेशिक स्पर्धेचे आयोजन करण्यात आले. अतिशय दर्जेदार व विविध विषयांचा वेध घेणाऱ्या चारही प्रादेशिक विभागाच्या नाट्यकृतींना नाशिककर रसिकांनी मोठा प्रतिसाद दिला. या नाट्यस्पर्धेतील सांघिक, वैयक्तिक विजेते व उपविजेत्यांचे महावितरणचे अध्यक्ष व व्यवस्थापकीय संचालक लोकेश चंद्र व संचालक राजेंद्र पवार यांनी अभिनंदन केले.

दोन दिवसीय राज्यस्तरीय नाट्यस्पर्धेच्या समारोपास अध्यक्षस्थानी कोकण प्रादेशिक विभागाचे सहव्यवस्थापकीय संचालक दिलीप जगदाळे होते. प्रमुख पाहुणे म्हणून मुख्य महाव्यवस्थापक अरविंद भादीकर, मुख्य तपास अधिकारी दत्तात्रय बनसोडे, स्पर्धेचे निमंत्रक व मुख्य अभियंता सुंदर लटपटे, हरिष गजबे (चंद्रपूर), चंद्रमणी मिश्रा (कल्याण), संजय पाटील (भांडुप), पवनकुमार कछोट (छत्रपती संभाजीनगर) नाट्यस्पर्धेचे मुख्य समन्वयक व मुख्य औद्योगीक संबंध अधिकारी संजय ढोके यांची उपस्थिती होती. पाहुण्यांच्या हस्ते विजेत्या संघांना करंडक तसेच वैयक्तिक गटातील विजेत्यांना स्मृतीचिन्ह व प्रशस्तीपत्र देऊन गौरविण्यात आले. परीक्षक म्हणून प्रभाकर दुपारे, चंद्रकांत जाडकर, मीनाक्षी केंढे यांनी काम पाहिले. नाट्यस्पर्धेत कोकण प्रादेशिक विभागाने ‘आवर्त‘, पुणे प्रादेशिक विभागाने ‘डॉक्टर तुम्ही सुद्धा‘, नागपूर प्रादेशिक विभागाने ‘रंगबावरी‘ आणि छत्रपती संभाजीनगर प्रादेशिक विभागाने ‘केस नं. ९९‘ नाट्यप्रयोग सादर केले.

महावितरणच्या कामाचे स्वरूप पाहता नाट्यकर्मी कर्मचाऱ्यांना खूप कमी वेळ मिळतो. तरी देखील अथक परिश्रम घेत नाट्य कलावंतानी अतिशय दर्जेदार कलाकृती सादर केल्या आहेत. महावितरणच्या कर्मचाऱ्यांना नवऊर्जा देणारी ही नाट्यस्पर्धा आहे असे सहव्यवस्थापकीय संचालक जगदाळे यांनी सांगितले.

राज्यस्तरीय नाट्यस्पर्धेचा निकाल

सर्वोत्कृष्ट नाटक – प्रथम- डॉक्टर, तुम्ही सुद्धा! (पुणे), द्वितीय- रंगबावरी (नागपूर), दिग्दर्शन : ज्ञानदेव पडळकर व संध्या चिवंडे, अभिनय (पुरुष) – विजय जोशी व श्रावण कोळनुरकर, अभिनय (स्त्री) – रोहिणी ठाकरे व भक्ति जोशी, नेपथ्य -सतीश सरोदे व राम मेस्त्री, प्रकाशयोजना -अभय येरडे व अभिजीत सिकनिस, संगीत -रुपेश देशमुख व अनिल राजपूत,रंगभूषा व वेशभूषा -विकास पुरी व प्रशांत ठाकरे, उत्तेजनार्थ (अभिनय)श्रद्धा मुळे, सचिन निकम सायली सायनकर आणि रमेश शिंदे यांना सन्मानित करण्यात आले.