Election frenzy: मंत्री रावल यांच्या मतदार संघात आ. राम भदाणेंची भूमिका काय? नगराध्यक्षपदासाठी ५० इच्छुक महिलांची रांग

या बैठकीत नगराध्यपदासाठी माजी नगराध्यक्ष रजनी वानखेडे, मीरा पाटील, सुरेखा देसले, रजूबाई माळी, उषाबाई चौधरी यांसह ५० हून अधिक इच्छुकांनी मुलाखती दिल्या. यावेळी भाजपाचे धुळे ग्रामीण जिल्हाध्यक्ष बापू खलाणे, माजी नगराध्यक्ष अनिल वानखेडे, जिल्हा सरचिटणीस डी.एस. गिरासे आणि भाजपाचे शहराध्यक्ष संजयकुमार महाजन उपस्थित होते. भाजपाचे सरचिटणीस गिरासे यांनी उमेदवारांना पक्षाच्या नियमावली आणि निवडणूक मार्गदर्शन केले.

आ. राम भदाणे म्हणाले की, मुख्यमंत्री देवेंद्र फडणवीस यांच्या नेतृत्वाखाली राज्यात राबविण्यात आलेल्या विविध योजनांमुळे गोरगरीब आणि सर्वसामान्य जनतेच्या विकासाचे भरीव काम सुरू आहे. त्याचा परिपाक म्हणजे शिंदखेडा नगरपंचायतीत भाजपाचा विजय निश्चित आहे. प्रत्येक जागेसाठी दोन ते चार इच्छुक असतात. उमेदवारी सर्वांना मिळणे शक्य नसले तरी नाराजी नको. ज्यांना उमेदवारी मिळणार नाही, त्यांना पक्ष भविष्यात शंभर टक्के संधी देईल. पालकमंत्री जयकुमार रावल यांच्या नेतृत्वाखाली शिंदखेड्यात पुन्हा भाजपाचाच झेंडा फडकेल, असा आत्मविश्वास त्यांनी यावेळी व्यक्त केला.

उमेदवारी देताना कार्यकर्त्यांचे कार्य, प्रभागातील कामगिरी आणि विधानसभा निवडणुकीतील योगदान विचारात घेतले जाणार असल्याचे त्यांनी सांगितले. प्रत्येक निवडणूक ही लढाईसारखी असते. प्रत्येक कार्यकर्ता महत्वाचा आहे. कुणाकडेही दुर्लक्ष होता कामा नये. दिवंगत माजी आमदार द. वा. पाटील यांच्या कार्याचा आ.राम भदाणे यांनी उल्लेख केला. दिवंगत माजी आमदार द. वा. पाटील यांनी त्यांच्या कारकिर्दीत तयार केलेला लोकसंपर्क आणि विकासकामे आजही जनतेच्या मनात आहेत असे ते म्हणाले.

बैठकीच्या शेवटी भाजपा जिल्हाध्यक्ष बापू खलाणे यांनीही पक्षाच्या विजयाविषयी मनोदय व्यक्त केला.