धुळे : एक जुलैपासून महावितरणच्या टीओडी मीटर असलेल्या घरगुती ग्राहकांना सकाळी नऊ ते संध्याकाळी पाच या वेळेत वापरलेल्या विजेवर टीओडी (टाइम ऑफ डे) सवलत लागू झाली आहे. टीओडी मीटर बसवलेल्या धुळे जिल्ह्यातील २८ हजार ७४९ घरगुती ग्राहकांना जुलै आणि ऑगस्ट महिन्यात मिळून एकूण पाच लाख २१ हजार रुपयांची सवलत वीज देयकात मिळाली आहे.
महावितरणकडून राज्यातील घरगुती वीज ग्राहकांसाठी स्मार्ट टीओडी (टाइम ऑफ डे) मीटरचा वापर करण्यात येत आहे. महाराष्ट्र विद्युत नियामक आयोगाने पुढील पाच वर्षांसाठी निश्चित केलेल्या वीजदरामध्ये घरगुती ग्राहकांना दिवसाच्या वीज वापरामध्ये प्रतियुनिट ८० पैसे ते एक रुपया सवलत जाहीर केली आहे. त्यानुसार घरगुती ग्राहकांना टीओडीप्रमाणे वीजदरात सवलत मिळण्याचा प्रत्यक्ष फायदा एक जुलैपासून सुरु झाला आहे.
महावितरणकडून हे स्मार्ट टीओडी मीटर ग्राहकांकडे मोफत लावण्यात येत आहेत. नव्या तंत्रज्ञानाने मीटरचे रीडिंग होणार असल्याने अचूक देयक मिळतील. आणि घरातील विजेचा वापर दर तासाला संबंधित ग्राहकांना मोबाईलवर पाहता येणार आहे. त्यामुळे वीज वापरावरही थेट नियंत्रण राहणार आहे. सकाळी नऊ ते सायंकाळी पाच या वेळेत वीजग्राहक घरातील वॉशिंग मशीन, गिझर, एअर कंडिशनर व इतर उपकरणांचा मोठा वापर करतात. त्यात टीओडी मीटरमुळे ग्राहकांचा मोठा आर्थिक फायदा होणार आहे.
टाईम ऑफ डे प्रणालीनुसार वीज वापराच्या कालावधीप्रमाणे दर आकारणी केली जाते. औद्योगिकनंतर घरगुती ग्राहकांना प्रथमच स्वस्त वीज दरासाठी टीओडीप्रमाणे आकारणी सुरू झाली आहे. महावितरणकडून २०२५ ते २०३० या पाच वर्षांसाठी घरगुती ग्राहकांसाठी टाईम ऑफ डे (टीओडी) नुसार स्वस्त वीजदराचा प्रस्ताव आयोगाकडे सादर करण्यात आला होता. त्यानुसार आयोगाने घरगुती ग्राहकांसाठी सकाळी नऊ ते सायंकाळी पाच या वेळेत वापरलेल्या विजेसाठी प्रतियुनिट ८० पैसे ते एक रुपया अशी सवलत मंजूर केली आहे. यात एक जुलै २०२५ ते मार्च २०२६ मध्ये ८० पैसे, २०२६-२७ मध्ये ८५ पैसे, २०२७-२८ आणि २०२८-२९ मध्ये ९० पैसे तसेच २०२९-३० मध्ये एक रुपये प्रतियुनिट सवलत मिळणार आहे.
या सवलतीचा लाभ घेण्यासाठी टीओडी मीटर घरगुती ग्राहकांकडे बसविणे आवश्यक आहे. तांत्रिकदृष्ट्या हे मीटर अधिक स्मार्ट स्वरूपाचे असले तरी ते प्री-पेड नसून, पोस्टपेड आहेत. पूर्वीप्रमाणेच वीजवापरानंतरच ग्राहकांना वीज देयक मिळणार आहेत. हे मीटर मोफत बसवण्यात येत असून, ग्राहकांना कुठलाही आर्थिक भुर्दंड बसणार नसल्याचे महावितरणने स्पष्ट केले आहे. यात मानवी हस्तक्षेपाला अजिबात वाव नाही. ऑटोमॅटिक मीटर रीडिंगमुळे ग्राहकांना अचूक व वेळेवर देयक मिळतील. ग्राहकांनी टीओडी मीटर बसविण्यासाठी महावितरण आणि संबंधित संस्थेला सहकार्य करावे, असे आवाहन करण्यात आले आहे.
