नाशिक भविष्यात उद्योगांचे केंद्र… मुख्यमंत्री देवेंद्र फडणवीस असे का म्हणाले ?

शिलापूर येथील केंद्रीय विद्युत संशोधन संस्थेच्या (सीपीआरआय) प्रादेशिक इलेक्ट्रिक तपासणी प्रयोगशाळेचे उद्घाटन केंद्रीय ऊर्जामंत्री मनोहरलाल खट्टर आणि मुख्यमंत्री देवेंद्र फडणवीस यांच्या हस्ते झाले. यावेळी छगन भुजबळ, गिरीश महाजन, दादा भुसे या मंत्र्यांसह सीपीआरआयचे महासंचालक आशिष सिंग, आ. सरोज अहिरे, आ. राहुल ढिकले आदी उपस्थित होते.

यावेळी फडणवीस यांनी, सीपीआरआयची प्रादेशिक तपासणी प्रयोगशाळा महाराष्ट्रासाठी महत्त्वाची असल्याचे सांगितले. यापूर्वी विद्युत उपकरण तपासणीवर खर्च अधिक होत असल्याने या क्षेत्रातील गुंतवणूकीला मर्यादा येत होत्या. या प्रयोगशाळेमुळे रोहित्रापासून सर्व विद्युत उपकरणांपर्यंत विविध उत्पादनांसाठी आवश्यक व्यवस्था तयार होईल. राज्यात पुणे, नाशिक आणि छत्रपती संभाजीनगर येथे ईव्ही उत्पादनाला चालना देण्यात येत असून प्रयोगशाळेमुळे या क्षेत्रालाही फायदा होईल. खाणकाम उद्योगातील उपकरणे नाशिकमध्ये तयार होणार आहेत. समृद्धी महामार्गामुळे गुंतवणुकीचे प्रमुख केंद्र म्हणून नाशिकची ओळख प्रस्थापित होत आहे. नाशिकपासून जेएनपीटीपर्यंत उत्पादनाची वाहतूक सुलभ होणार आहे, वाढवण बंदराशीही नाशिक जोडले जाणार असल्याने ‘उद्योगाचे जंक्शन’ म्हणून नाशिकचा भविष्यात विकास होईल, असे फडणवीस यांनी सांगितले.

ऊर्जा क्षेत्रात केंद्र सरकारने सुरू केलेल्या मानांकन प्रक्रियेत महाराष्ट्र प्रथम क्रमांकावर आहे. राज्यात प्रलंबित असलेल्या पारेषण वाहिन्यांची कामे पूर्णत्वाकडे नेण्याचा प्रयत्न होत आहे. केंद्र सरकारने आरडीएस योजनेअंतर्गत २९ हजार कोटी राज्याला दिले, त्या माध्यमातून मोठ्या प्रमाणात सुधारणा करण्यात येत आहे. पुढील तीन ते चार वर्षात महाराष्ट्रात ऊर्जा क्षेत्रातील विश्वासार्ह पायाभूत सुविधा उभ्या राहतील. उद्योग व्यवसायावर कृषी वीजचा असणारा भार पाहता येत्या काळात १६ हजार मेगावॅट वीज निर्माण करून शेतकऱ्यांना दिवसा वीज देण्यात येईल, असे त्यांनी सांगितले.

प्रयोगशाळेचे केंद्रीय मंत्र्यांकडून कौतुक

केंद्रीय ऊर्जामंत्री मनोहरलाल खट्टर यांनी ही अत्याधुनिक प्रादेशिक चाचणी प्रयोगशाळा विज्ञान आणि अभियांत्रिकीचे उत्कृष्ट प्रतीक असल्याचे सांगितले. रोहित्र, एनर्जी मीटर, स्मार्ट मीटर, ट्रान्सफॉर्मर ऑइल आणि इतर वीज उपकरणांचे उत्पादक येथे देण्यात येणाऱ्या प्रगत चाचणी आणि प्रमाणन सेवांचा लाभ घेऊ शकतील, असे त्यांनी सांगितले. छगन भुजबळ यांनी नाशिकमध्ये कुशल मनुष्यबळ आणि दळणवळण सुविधा असल्याने विद्युत क्षेत्रातील मोठे उद्योग आकर्षित होतील, असा विश्वास व्यक्त केला.