नवी मुंबई : वाशी येथील छत्रपती शिवाजी महाराज चौक हा मध्यवर्ती मुख्य चौक असून येथे वाहतुकीची नेहमी वर्दळ असते. या वाहतुकीचे नियमन करण्याच्या दृष्टीने विविध उपाययोजना वाहतूक पोलीस विभागाचे अभिप्राय घेऊन नवी मुंबई महानगरपालिकेच्या अभियांत्रिकी विभागामार्फत करण्यात येत असतात. अशाच प्रकारची ‘जंक्शन बॉक्स’ ही एक अभिनव संकल्पना वाहतूक नियमनाच्या दृष्टीने वाशी येथील छत्रपती शिवाजी महाराज चौकात राबविण्यात आलेली आहे.
जंक्शन बॉक्सव्दारे वाहतुकीचा प्रवाह सुयोग्य रितीने नियंत्रित होणार असून सहसा वाहनांची वर्दळ असलेले व्यस्त चौक, क्रॉस रोड्स, टी – जंक्शन्स अशा ठिकाणी ते बसविले जातात. ज्या ठिकाणी वाहतूक नियंत्रण करणाऱ्या ट्रॅफिक सिग्नलसारख्या नियंत्रण व्यवस्था उपलब्ध असूनही वाहतूक सुरळीत राहत नाही व स्थिर वाहने अडथळा निर्माण करतात त्याठिकाणी बॉक्स जंक्शनचा मोठ्या प्रमाणावर उपयोग होतो.
जंक्शन बॉक्समध्ये वाहनांना थांबण्यास प्रतिबंध असल्याने जंक्शन नेहमी मोकळे राहतात आणि वाहतूक सुरळीत होण्यास मदत होते. जंक्शन बॉक्सबाबत कोड ऑफ प्रॅक्टीस रोड मार्किंग अंतर्गत नियमाची तरतूद आहे. प्रायोगिक तत्वावर वाशी येथील मध्यवर्ती छत्रपती शिवाजी महाराज चौकात जंक्शन बॉक्स तयार केला असून तेथील उपयोगिता लक्षात घेऊन शहरातील इतरही मुख्य व वर्दळीच्या चौकांमध्ये जंक्शन बॉक्स संकल्पना राबविण्याचे नियोजन असल्याची माहिती शहर अभियंता संजय देसाई यांनी दिली.
