उलवे नोड परिसरातील बेदखल वाहनांवर वाहतूक पोलिसांची कारवाई…

गेल्या काही महिन्यांपासून उलवे नोडमधील विविध सेक्टरमध्ये रिक्षा, दुचाकी आणि चारचाकी वाहने रस्त्यांच्या कडेला सोडून देण्यात आली होती. त्यामुळे वाहतुकीत अडथळा निर्माण होऊन नागरिकांना मोठ्या गैरसोयीचा सामना करावा लागत होता. वारंवार तक्रारी करूनही प्रशासनाकडून कोणतीही ठोस कारवाई न झाल्याने नागरिकांकडून नाराजी व्यक्त करण्यात आली होती. ‘लोकसत्ता’ने या समस्येवर प्रकाश टाकल्यानंतर वाहतूक विभागाने तातडीने हालचाल सुरू केली.

सीवूड्स वाहतूक विभागाने उलवे सेक्टर २ आणि आसपासच्या परिसरात बेदखल वाहनांवर मोठी मोहीम राबवली आहे. सार्वजनिक स्थळी दीर्घकाळापासून उभ्या असलेल्या आणि सुरक्षेच्या दृष्टीने धोका निर्माण करणाऱ्या या ‘बेनामी’ वाहनांची सखोल तपासणी करण्यात येत आहे.

पोलिसांनी अनेक दिवसांपासून एकाच ठिकाणी उभ्या असलेल्या वाहनांचे नोंदणी क्रमांक, दस्तावेज आणि मालकांची माहिती तपासण्यास सुरुवात केली आहे. काही वाहनांच्या नंबर प्लेट गायब असून, संशयास्पद स्थितीत आढळल्याने त्यांचा स्वतंत्र अहवाल तयार करण्यात आला आहे.

वाहतूक पोलिसांच्या या कारवाईमुळे उलवे परिसरातील वाहतुकीतील अडथळे कमी होतील आणि नागरिकांची सुरक्षा अबाधित राहील अशी अपेक्षा नागरिकांकडून व्यक्त करण्यात येत आहे. परंतु, केवळ तोंडदेखली कारवाई न करता या वाहनांचा कायमस्वरूपी बंदोबस्त करावा आणि यापुढे पुन्हा अशी वाहने रस्त्यावर आढळू नये याची खबरदारी घ्यावी अशी मागणी उलवे शहर नियोजन समितीच्या संतोष काटे यांनी केली आहे.

मोहीम यापुढेही सुरूच

‘बेदखल वाहनांमुळे परिसराच्या सुरक्षेवर प्रश्नचिन्ह निर्माण होत होते. नागरिकांच्या तक्रारींनंतर १ अधिकारी आणि ४ कर्मचाऱ्यांच्या साहाय्याने ही कारवाई सुरू करण्यात आली आहे. परिसरातील बेदखल वाहनांचा शोध घेणे सुरू असून, नागरिकांच्या सुरक्षिततेसाठी ही मोहीम सातत्याने सुरू राहील,’ असे सीवूडस वाहतूक विभागाने स्पष्ट केले आहे.