भावनांना नाव

– आनंद या मन:स्थितीसाठी काही शब्द :  समाधानी, खूश, मस्त, मजेत, गंमतीत, तृप्त, उत्साही, खेळकर, सर्जनशील, आशादायक इ.

– दु:ख या मन:स्थितीसाठी काही शब्द : एकाकी, निराश, अस्वस्थ, दुखावलेला, दुर्लक्षित, चिंतातुर इ.

– राग या मन:स्थितीसाठी काही शब्द : अपमानित, असुरक्षित, तिरस्कार, टीका सहन करणारा, जाणीवपूर्वक दुर्लक्षित.

आपली मन:स्थिती आत्ता कशी आहे, हे शोधण्यासाठी हे काही शब्द. हे शब्द सापडले तर असं का वाटतं आहे याच्या मुळाशी जाता येईल. ते जमलं तर लक्षात येईल की याच्या मागे निश्चितपणे कोणती तरी घटना आहे. झालेली घटना बदलू शकत नाही. पण होणारे प्रसंग टाळता येतील. यासाठी मन:स्थिती शोधणं आणि ती बदलणं हे महत्त्वाचं.

आपण आपल्या भावना नेमकेपणाने ओळखत नाही, म्हणून त्या बदलत नाहीत, त्याऐवजी आपण भावना थोपवतो. दाबतो. मनात कोंडून ठेवतो. का? तर आपल्या आसपासच्या लोकांना नेहमीच थोपवलेल्या भावना हव्या असतात. आणि आपण ते बरोबर शिकतो. इतरांनाही शिकवतो. भावना वेडय़ावाकडय़ा मार्गाने बाहेर पडायला नकोत, हे बरोबर. पण मेंदूच्या भाषेत भावना या रसायनांच्या स्वरूपात असतात. त्या दाबल्या तर शरीरावर विविध बरेवाईट परिणाम केल्याशिवाय राहत नाहीत.

– श्रुती पानसे

contact@shrutipanse.com