कुतूहल: सायबर गुन्ह्यांतील कृत्रिम बुद्धिमत्ता

आयबीएमच्या शास्त्रज्ञांनी प्रायोगिक तत्त्वावर विकसित केलेली कृत्रिम बुद्धिमत्तायुक्त सुरक्षाभेदक प्रणाली, ‘डीप लॉकर’ तेच करते. ती सामान्य विदा म्हणून लक्ष्य संस्थेच्या जालावर पाठवली जाते, आणि जोपर्यंत इच्छित लक्ष्य गाठले जात नाही, तोपर्यंत कूटबद्ध केलेली तिची प्रणाली प्रकट करत नाही.

सोबतच्या चित्रात एका संस्थेचे माहितीजाल दाखविले आहे. शर्विलकांची कूटप्रणाली या जाळ्यात अशी शिताफीने फिरते की तिचे अंतिम लक्ष्य असलेल्या संगणक किंवा विशिष्ट संगणक जालालाही ते कळत नाही. कृत्रिम बुद्धिमत्तेचा वापर करणारी कूटप्रणाली सुरक्षा प्रणालींना चकवून विशिष्ट लक्ष्यावर हल्ला करते.

अशा कूटप्रणालीयुक्त हल्ल्याचा सामना कसा करायचा, कारण हल्ला कुठून आणि कसा होणार हे माहीतच नसेल तर, कुठे कुठे म्हणून सुरक्षा बळकट करावी? त्या संदर्भात खबरदारी घेणे हाच मंत्र आहे. पुढील काळजी घेता येऊ शकते… १) आपले मौलिक दस्तऐवज (क्रिटिकल असेट्स) ओळखून त्यांच्यासाठी खास सुरक्षा प्रणाली ठेवणे, २) सर्व प्रणाल्या म्हणजे ऑपरेटिंग सिस्टम, अॅप्स आणि अँटीव्हायरस प्रणाल्या अद्यायावत ठेवणे आणि ३) सर्व सुरक्षा प्रणाल्यांवर २४ तास नजर ठेवणे. एखादी नेहमीपेक्षा थोडी वेगळी घटना आढळल्यास तिचा त्वरित परामर्श घेणे आणि जर ती जास्त घातक वाटली तर, वरिष्ठ व्यवस्थापनाला कळवून उपयोजित प्रतिकाराची व्यवस्था करणे.