प्रशासकीय ‘अ’ इमारतीमधील २८ कार्यालये एप्रिलपासून सुरू

पालघर : पालघर जिल्हा मुख्यालयातील प्रशासकीय ‘अ’ इमारतीमधील २८ कार्यालय एप्रिलपासून कार्यरत होणार असून या कार्यालयांसाठी विद्युत जोडणी देण्याचे काम महावितरणने सुरू केले आहे. मात्र प्रशासकीय ‘ब’ इमारतीचे अंतर्गत काम रेंगाळले असून पावसाळय़ापूर्वी या इमारतीचे काम होण्याची शक्यता कमी आहे.

सप्टेंबर २०२१ पासून जिल्हा मुख्यालय संकुलातील जिल्हाधिकारी कार्यालय, पोलीस अधीक्षक कार्यालय तसेच जिल्हा परिषद कार्यालय कार्यरत झाले. मात्र या कार्यालयांसाठी पहिल्या महिन्यात आलेला विद्युत खर्च पाहता प्रशासकीय इमारतीमध्ये कार्यालयात स्थापन होणाऱ्या सर्व कार्यालयांसाठी स्वतंत्र विद्युत मीटर बसवणे व मध्यवर्ती वातानुकूलित बसवण्याऐवजी प्रत्येक कार्यालयाला गरजेनुसार स्वतंत्र वातानुकूलित यंत्र बसविण्याचे योजिण्यात आले. त्यामुळे गेल्या काही महिन्यांपूर्वी इमारतींचा भोगवटा प्रमाणपत्र प्राप्त झाले असले तरीही विद्युतीकरणाचे काम प्रलंबित राहिले होते.ज्या कार्यालयांनी विद्युत जोडणी करता आवश्यक कागदपत्र व आगाऊ रकमेचा भरणा केला आहे, त्या कार्यालयांना वीज जोडणी देण्याचे काम हाती घेतले असल्याची माहिती महावितरणतर्फे सांगण्यात आले. वीज जोडणीचे काम मार्चअखेपर्यंत पूर्ण होईल असे सांगण्यात आले. त्याच पद्धतीने जिल्हाधिकारी कार्यालय प्रशासकीय ‘अ’ इमारतीमध्ये सर्व संबंधित कार्यालयांना १ एप्रिलपासून कार्यरत होण्याच्या सूचना देण्यात आल्या आहेत.या इमारतींमध्ये येणाऱ्या सामूहिक खर्चाच्या विषय निर्णय घेण्यासाठी पाच सदस्य समिती गठित करण्यात आली असून नवीन कार्यालयात स्थलांतरित होणाऱ्या या वेगवेगळय़ा विभागातील कार्यालयाशी समन्वय साधण्यासाठी ही समिती क्रियाशील राहील, अशी अपेक्षा आहे.

प्रशासकीय कार्यालये

जिल्हा अधीक्षक भूमी अभिलेख, जिल्हा पशुसंवर्धन उपायुक्त, साहाय्यक आयुक्त समाज कल्याण, जिल्हा उप निबंधक सहकारी संस्था, साहाय्यक जिल्हा निबंधक एक वर्ग तथा मुद्रांक जिल्हाधिकारी, स्थानिक निधी लेखा परीक्षा उपअधीक्षक, भूमी अभिलेख, जिल्हा अधीक्षक कृषी अधिकारी, साहाय्यक आयुक्त अन्न व औषध प्रशासन, महाव्यवस्थापक जिल्हा उद्योग केंद्र, जिल्हा महिला व बालविकास अधिकारी, साहाय्यक आयुक्त राज्य गुप्तवार्ता विभाग, साहाय्यक आयुक्त मत्स्यव्यवसाय, कामगार उपायुक्त, वरिष्ठ भूवैज्ञानिक भूजल सर्वेक्षण व विकास यंत्रणा, महाराष्ट्र राज्य खादी व ग्रामोद्योग मंडळ, जिल्हा व्यवसाय शिक्षण व प्रशिक्षण कार्यालय, अनुसूचित जमाती प्रमाणपत्र तपासणी समिती, जिल्हा क्रीडा अधिकारी, महाराष्ट्र जीवन प्राधिकरण, वेतन व भविष्य निर्वाह निधी पथक व इतर कार्यालयांचा समावेश आहे.