कच्छ व दादर बिकानेर एक्सप्रेसला पालघर येथे थांबे

पालघर लोकसभा मतदारसंघाचे खासदार डॉ. हेमंत सवरा यांनी वारंवार रेल्वेमंत्री यांच्याकडे पत्रव्यवहार तसेच संसदेत प्रश्न उपस्थित करून लांब पल्ल्याच्या गाड्यांना पालघर येथे थांबण्याकरिता सातत्याने पाठपुरावा केला होता. त्यांच्या प्रयत्नांना यश मिळाले असून या गाड्यांचा पालघर येथे थांबा सुरु होत आहे.

२२९५५ डाऊन बांद्रा भुज कच्छ एक्स्प्रेसला 17 मे शनिवार पासून पालघर स्थानकात सायंकाळी ७.०० वाजता व २२९५६ अपगाडीला पालघर स्थानकात सकाळी ९.३४ वाजता थांबा देण्यात येणार आहे. तर १२४९० डाऊन दादर-बिकानेर एक्स्प्रेसला 18 मे पासून रविवारी दुपारी ४.१४ वाजता व १२४८९ अप गाडीला 21 मे पासून सकाळी ११.१२ वाजता पालघर स्थानकात थांबा देण्यात येणार आहे. यामध्ये बांद्रा भुज कच एक्सप्रेस ला पालघर रेल्वे स्थानकात रोज थांबा दिला जाणार असून दादर बिकानेर एक्सप्रेस ला बुधवार व रविवारी पालघर येथे थांबा दिला जाणार असल्याचे रेल्वे प्रशासनाकडून सांगण्यात आले आहे.

पालघर रेल्वे स्थानकाला अ दर्जा प्राप्त झाला असून लांब पल्ल्याच्या गाड्यांना पालघर येथे थांब्याकरिता गल्या अनेक वर्षांपासून मागणी होत होती. पालघर जिल्हा झाल्यानंतर गेल्या काही वर्षांपासून पालघरचा होत असलेला विकास पाहता पालघर मधून दक्षिणेला व उत्तरेकडे जाणाऱ्या इतर गाड्यांना थांबायची आवश्यकता आहे. त्या अनुषंगाने नागरिकांकडून मागणी पुढे येत आहे.

पालघर हे जिल्ह्याचे मुख्यालय असून येथे वाढवण बंदर, विमानतळ प्रकल्प तसेच तारापूर औद्योगिक वसाहत यांसारखी महत्त्वाची औद्योगिक केंद्रे कार्यरत आहेत. वाढती औद्योगिक गरज आणि प्रवाशांची संख्या लक्षात घेता या थांब्यांची या भागाला आवश्यकता होती. या निर्णयामुळे पालघर जिल्ह्याच्या नागरिकांना, उद्योग क्षेत्राला व प्रवाशांना मोठा दिलासा मिळणार असून प्रवास अधिक सुलभ, सोयीस्कर आणि कार्यक्षम होणार आहे. या निर्णयामुळे पालघर जिल्ह्यातील नागरिकांना प्रवासाची अधिक सुविधा मिळणार असून उत्तर महाराष्ट्र, गुजरात व राजस्थानकडे जाणाऱ्या प्रवाशांना विशेषतः लाभ होणार आहे.

पालघर मतदार संघात अनेक वर्षापासून रेल्वे समस्या असून या सोडविण्याकरिता मी रेल्वेमंत्र्यांची भेट घेऊन समस्या सोडविण्याचा प्रयत्न करीत आहे. उपनगरीय रेल्वे सेवेचा दर्जा सुधारण्यासाठी माझे सतत प्रयत्न व पाठपुरावा सुरू आहे.
डॉ. हेमंत सवरा, खासदार